E atletanan di Brazil, San Nicolas, Estrella y Moi Dum Taekwondo a yega Miami cerca Juan Moreno
ORANJESTAD (AAN)— Dialuna anochi e grupo di 19 atleta for di e 4 scolnan di Taekwondo di Aruba a yega Kendall cerca Juan Moreno pa un siman di training combina cu un Taekwondo Feast cu lo tuma lugar Diasabra entre otro scolnan di Miami. E trainingnan ta mainta 10’or y anochi for di 7’or te cu 9’or. Despues di un vuelo di 2 ora y mey e muchanan por a pone nan maletanan na hotel, cambia nan panianan y bay direction pa Kendall cerca Juan Moreno kende a ricibinan cu dos man habri. E atletanan a train cu e grupo grandi di Peak Performance.
Juan a introduci e atletanan na su grupo grandi y tambe splicanan di e trainingnan di mainta y anochi. E atletanan tabata hopi contento di por a topa Juan Moreno, pasobra nan a tende y wak potret so di dje. E dia anochi ey nan a wak e y papia cune y te hasta saca potret cu Juan Moreno.
E mayornan cu a bay tabata hopi contento di por ta parti di e grupo y nan tambe a dicidi di saca potret cu Juan Moreno. E training a bay den bon ambiente y di biaha a cuminsa cu e warming up na unda cu varios ehercisio a ser duna for di pia te cu cabez, tur esaki a ser duna durante e loop pas cu ta ser haci den e sala di training.
Despues a train ariba e cusinchi (flep) na unda cu a haci hopi variacion di tecnicanan manera atake y contra atake ariba e cusinchi.
Tambe a introduci e atletanan cu varios campeonnan di USTA cu ta train cerca Juan Moreno. Diaranson e atletanan a bay train na Peak Performance na Coral Springs, cerca Russell. For di Miami pa pueblo di Aruba Alberto Klaber di Brazil Taekwondo Stichting.
