E boluntad tey pa hunto busca e metanan comun cu por pone Reino funciona
Prome Minister Eman: aunke tin partidonan cu diferente pensamento…ORANJESTAD (AAN): Den entrevista cu Prome Minister Mike Eman for di Hulanda, el a laga sa cu tin partidonan basta critico si realmente un Reino Hulandes consistiendo di un parti Caribense y un parti Europeo por funciona. E partidonan aki ta mira mucho diferencia di pensamento, mucho desconfianza entre e diferente comunidadnan pa por mira cu optimismo e futuro di e funcionamento di un Reino Hulandes den e contexto di e parti Europeo hunto cu e parti Caribense, e mandatario a señala.
E mesun partidonan aki, esun cu a resalta den esaki ta VVD cu tabata esun mas preocupa, a termina su pensamentonan cu e deseonan cu por bay cuminza enfatiza e “win-win position”, cu e dos partinan aki di Reino por tin pa otro mirando e relacionnan transatlantico, e posicion strategico di nos islanan y mirando e posibilidadnan economico cu esaki por ofrece tambe pa tur dos parti di Reino Hulandes.
Segun Premier Eman, esey kiermen cu apesar cu tin preocupacion riba e diferencianan cu ta pone tog duda hopi biaha ariba e base comun cu por tin pa un reino por funciona. Sinembargo e mesun personanan aki ta enfatiza cu tin oportunidadnan cu tin cu explora pa mira con por crea unda cu no tin e basenan comun pa garantiza futuro di Reino Hulandes.
A opina cu esaki ta un acercamento hopi positivo. Nan tey caba, a bisa, y e personanan aki ta kere cu por ta nan no tey ainda y mester crea nan.
En todo caso, e boluntad tey pa hunto busca e metanan comun cu por pone Reino funciona pa tur partner y pa tur e pueblonan cu ta depende di e resultadonan pa por haya un mihor porvenir, Minister Presidente a señala.
