Entrada di impuesto ta considerablemente abou den e promer cinco lunanan di 2010
Banco Central a mustra
ORANJETSAD (AAN): E Relato Mensual combina pa e lunanan di April y Mei 2010 di Banco Central (BCA) ta conclui cu e entrada total di impuesto pa e prome cinco lunanan di 2010 a cay cu Afl. 52,9 miyon (14,1 porciento). Un di e rasonnan primordial di e caida aki ta e ahuste den e tarifa riba benta di negoshi for di 3 porciento na 1,5 porciento, cual a resulta den un bahada den e ingreso aki di Afl. 28,4 miyon. Mas ainda, menos entrada di impuesto riba ganashi (Afl. 11,1 miyon), importacion (Afl. 5,8 miyon), y licencia pa opera casino (Afl. 3,9 miyon) tambe a contribui na e caida aki.
E cantidad di turista pa e prome cinco lunanan a mehora (3,9 porciento) compara cu 2009 (6,2 porciento). Aunke, cu e entrada nominal relata na turismo a crece marginalmente (1,0 porciento).
Di otro banda, e cantidad di turista crucero a mengua cu 7,4 porciento den e prome cinco lunanan. Den e lunanan di April y Mei, e cantidad di turista procedente di Venezuela a cay cu, respectivamente, 33,2 porciento y 27,5 porciento.
Esaki por worde atribui na e economia Venezolano debil, combina cu e restriccion di cambio di moneda relata na viahenan internacional, imponi pa e autoridadnan Venezolano. Den Mei e cantidad di turista Hulandes a expande considerablemente (25,0 porciento).
E subida aki probablemente tambe por a worde induci pa un campaña di promocion na Hulanda, cu a cuminsa na final di 2009 hunto cu e crecemento den e cantidad di stoel aereo como resuldado cu KLM a resumi su vuelonan pa Aruba.
E entrada real for di impuesto riba benta di negoshi (BBO) colecta den e luna di Juni 2010 a crece cu 6,7 porciento, cual ta indica un desaroyo positivo den luna di Mei 2010. E ta interesante pa remarca cu esaki ta e prome luna desde Augustus 2009 cu ta registra un subida.
E indice di prijs di consumo (CPI) di Juni 2010 a registra un crecemento 1,8 porciento. E promedio anual di inflacion, cual ta un indicador di e desaroyo den prijs riba termino largo, a baha cu 0,7 punto di porcentahe te na 1,7 porciento na Juni 2010 compara cu Juni 2009.
E desaroyo deflacionario cu a cuminsa na Augustus 2009 a caba na April 2010 ora cu a registra un subida den prijsnan di 0,6 porciento. E diferencia di inflacionario entre Aruba cu Merca, e partner principal di Aruba, a baha cu 0,8 punto di porcentahe na Juni 2010, compara cu 1,0 punto di porcentahe di e luna corespondiente un aña anterior.
E cantidad di placa den circulacion pa e lunanan di April y Mei 2010 a aumenta cu respectivamente, Afl. 25,1 miyon y Afl. 26,6 miyon te na Afl. 3.294,6 miyon. Na April, e expansion aki a worde causa mas tanto pa un subida di Afl. 21,5 miyon den e fluho neto di fondonan for di exterio hunto cu un crecemento den e activo domestico neto di Afl. 3,5 miyon.
E aumento den Mei a worde causa pa un subida di Afl. 41,3 miyon den e activo domestico neto, cual a worde partialmente mitiga pa un bahada di Afl. 14,7 miyon den e fluho neto di fondonan pa exterior. Consecuentemente, e reserva di divisa (excluyendo diferencianan den revaluacion di oro y reservanan internacional) a subi te na Afl. 1.527,1 miyon na final di Mei 2010, cual ta Afl. 67,4 miyon of 4,6 porciento mas cu e suma registra
den e luna corespondiente na 2009.
Den Juni, BCA a asisti gobierno cu e emicion di bononan riba e mercado local di respectivamente, Afl. 100,0 miyon den bononan di gobierno cu un duracion di 10 aña cu un rendimento anual di 5,5 porciento, y Afl. 80,0 miyon den bononan di gobierno cu un duracion di 15 aña cu un rendimento di 6,0 porciento.
