Equipo Nacional di Synchro di Canada ta entrena na Aruba e siman aki
ORANJESTAD (AAN) – Relacionnan amistoso di hopi tempo ta trece e Equipo Nacional di Canada di e deporte di landamento sincroniza na Aruba den e dianan aki, pa entrena hunto cu e atletanan di nos país. Pa e selección Arubano e entrenamento conhunto aki ta forma parti di nan proceso di preparación pa e Weganan Centro Americano y del Caribe (CAC) cu lo inicia próximamente na Mayaguez, Puerto Rico. Canada ta un di e paisnan mas reconoci históricamente den e deporte di landamento sincroniza. Desde cu synchro a bira deporte Olimpico na 1984, pero tambe den campeonatonan mundial, Canada a titula mayoría biaha den e puestonan di honor.
Awor e mihor atletanan di e país aki ta na Aruba pa yuda e selección nacional di nos país. Entrenando hunto den e piscina Olimpico na Savaneta, nos atletanan sigur ta siñando masha hopi mes di e compañeranan y asina ta bai dilanti den nan deporte.
Bou guía di e mundialmente conoci entrenadora Julie Sauvé, un total di diesdos atleta di Canada ta na Aruba y ta train cu e equipo di nos país cu dentro di algún dia lo ta saliendo pa competi den e Weganan CAC. E equipo Arubano ta consisti di: Anouk Eman, Nikita Pablo, Anna Posner, Carondina Leijdekkers, Janelle Flemming, Saskia Franken, Kiara van Trikt y Amanda Maduro.
Nan meta pa e Weganan CAC ta uno cla: logra un clasificación pa e Weganan Panamericano di 2011. E proceso di preparación cu nan a hiba pa logra esaki tabata uno difícil y intensivo. A competi, a entrena durante oranan largo y intensivo y a busca na varios ocasión ayudo for di expertonan di exterior.
Tecniconan di gran conocimento a bin pa reforza e staff técnico di nos país, cu di e forma aki tambe a logra progresa y actualiza nan conocimento. Además no por keda sin menciona cu treciendo atletanan for di exterior, Aruba ta promove su mes como un destinación turístico deportivo, loke ta un aspecto adicional interesante pa nos país.
AZB ta invita pueblo di Aruba henter pa pasa na piscina na Savaneta riba diahuebs, 15 di juli, entre 08.00 or di mainta y 1.00 or di merdia pa mira e atletanan di landamento sincroniza di Aruba y Canada den entrenamento, Ademas di esaki riba diamars, 20 di juli pa 7 or di anochi lo tin un demostración di e equipo di Canada y tambe e atletanan di nos propio país den acción na Savaneta, prome cu nan biahe pa e Weganan CAC. Bin apoya nos hoben atletanan y presencia nan den nan deporte preferí, esta landamento sincroniza!
