Home Deporte Éxito den e Mundial di equitacion na Puerto Rico

Éxito den e Mundial di equitacion na Puerto Rico

17
0
SHARE
- Advertisement -

cabay1Wernher Dijkhoff cu plata y Mark Bruin cu brons a encabeza 17 di e 22 atletanan di Aruba cu a bai final
ORANJESTAD — For di dianan 4 te cu 11 di juli 2010 e selección di 10 jinete y 12 amazona di Aruba a participa na e Mundial di equitacion Paso Fino pa Jinete y Amazona na San Juan, Puerto Rico. Aunke cu un desventaha grandi dor cu nan ta participa cu ehemplarnan cu a wordu asigna na nan pa medio di un sorteo, mientras cu e jinete y amazonanan di e pais organizado Puerto Rico y algun di Estados Unidos a participa cu nan propio ehemplar di alta calidad, nos jinete y amazonanan a demostra nan gran capacidad pa saca lo maximo hasta di e ehemplarnan di menos calidad y ta clasifica pa e competencia final.


Diabierna dia 9 di juni 2010 den e competencia di Amazona 4 pa 5 aña Chary-ann Kock di apenas 4 aña montando e ehemplar mas difícil den e categoria Encanto de Palmarina a logra clasifica y despues a gana e cinta di Quinto Puesto.

Dyami Croeze den Amazona di 6 pa 8 aña y Natalia Mouawad den categoria Amazona 9 pa 11 aña ta clasifica pero no ta logra cai den premiacion.

Den e categoria di Jinete di 6 pa 8 aña Jay Zievinger di 6 aña a demostra su domínio di e ehemplar Lambada de Besilu (cu despues ta sali den e categoria di Jinete di 21 pa 24 aña) y ta logra clasifica, pero lastimamente ora di e comparacion di e particpantenan den e prueba di dificultad ora di e cambio di direccion e ehemplar ta dal para cu ne pa cual motibo Jay no ta alcansa suficiente puntahe pa premiacion.

Chayon Kock aunke su ehemplar ta presenta cu un problema di calamber den su pata posterior ta core su prueba individual impecable y tog ta clasifica, pero no ta cai den premiacion.
Diasabra 10 di juli 2010 den categoria Amazona 12 pa 14 aña tres amazona di Aruba, Kassandra Oduber, Ava Rooijakkers y Yentl de Bruijn ta clasifica.

Despues ta sigi un competencia fuerte caminda ta compara e participantenan cu a clasifica cu otro pa medio di pruebanan di dificultad. Ava riba e yegua Muñequita de Oro ta hasi un tremendo trabow pa saca tur loke por for di e yegua ya di edad y ta logra conquista e cinta geel di Tercer Puesto.

Den Amazona 18 pa 20 aña Alina Mansur despues di clasifica cu e ehemplar Titanic de Villa Paraiso ta sigi den un bataya fuerte cu Valentina Velez di Colombia, Irelsy Rivera di Puerto Rico y Cristina Minter di Merca y ta termina na e Tercer Puesto.

Brigitte Werleman cu e yegua Alegria de Profeta ta clasifica den e categoria Amazona di 21 pa 24 aña, pero ta keda pafor di premiacion.

Diadomingo 11 di juli 2010 den categoria Jinete 12 pa 14 aña Arjean Martinus tambe ta clasifica.
Den e categoria Jinete 15 pa 17 aña tur tres jinete di Aruba ta clasifica y aunke Juan Jose Werleman y Ethanael Tromp ta hasi un gran esfuerzo ta Wernher Dijkhoff riba e ehemplar 30-30 de Cuentas Claras den e comparacion ta keda den posicion pa un medaya.

Despues di un competencia fuerte Wernher ta termina cu e medaya di plata cu un punta di diferencia tras di e medayista di oro Gabriel Arias di Puerto Rico.

Mark Bruin riba e yegua Hechizada de 4H den categoria Jinete 18 pa 20 aña, despues di clasifica ta wordu compara te final di e competencia cu Javier Arias di Puerto Rico y Adrian Garcia di Sto. Domingo. Mark su trabow duro ta hasie merecido di e medaya di brons.

Aunke cu Aruba no a regresa cu un medaya di oro, tog como team Aruba a lusi. E team di 22 atleta a keda na quinto lugar den e clasificacion final.

OCA ta orguyoso cu e prestacion y dedicacion di e team y ta manda un felicitacion na e integrantenan di e seleccion cu a traha duro y na e team tecnico consistiendo di e coach Igor Kock y su asistentenan Gino, Nito, Joa y Gail. E tabata un gran esfuerzo.

- Advertisement -

DUNA COMENTARIO

Please enter your comment!
Please enter your name here