Diario Online

Gobierno di Chavez cu mas medida cu ta stroba turismo Venezolano di bin Aruba

Publication: Tuesday, 27 July 2010. Categoria: General

500 dollar pa bin Aruba ta mucho tiki!
ORANJESTAD (AAN): DIARIO a haya informacion cu a pesar cu tur esfuerzo ta ser haci pa e turista venezolano por sigui bishita nos isla, tin diferente aspecto cu ta stroba esaki. Recientemente Minister di Turismo di Aruba, Sr. Otmar Oduber a anuncia cu entrante 27 di Juli, esta awe, Aruba lo bira un hub entre Venezuela y Miami, atravez di Vision Air y Venezolana, pero tog tin detayenan cu ta haci cu e turista venezolano ta worde stroba pa por haci su viahe. Aunke mester bisa cu e acuerdo cu a ser logra ta hopi importante pa e desaroyo turistico y di transporte aereo pa Aruba, ta keda pendiente algun cos cu mester tene cuenta cune.
Nos ta papiando akinan di e asunto di asignacion di dolar pa e viaheronan cual awor ta exigi di e usuarionan y solicitantenan mas rekisito pa e aprobacion di e derecho na usa e tarhetanan di credito (credit card) na otro paisnan.

Tin indicacion cu e agencianan di viahe na Venezuela y regional ta planteando algun manera pa adapta na e normativa aki, cu ta regula e otorgamento di divisanan, tumando na cuenta e lugar di destino y e tempo di duracion di e estadia.

E resolucion aki mas cu representa e restriccion di e divisanan, pa e personanan cu ta viaha, ta implica e realizacion di un tramite cu cada bez ta birando mas fastioso y dificil pa e famianan cu tin e deseo di bay den exterior.

Cu e medida nobo aki, e proceso di solicitud di divisa ta mas tedioso, ya cu e revision di e documentonan awor a bira mas stricto. Entre e rekisitonan ta destaca e presentacion di ticketnan y un declaracion firma pa e viahero cu mester worde presenta na e banco.

E declaracion aki lo mester inclui e dianan exacto cu e solicitante lo ta di viahe y den caso extremo, cu e ta dicidi amplia e lapso di tempo, e lo ta suheto na sospecho di parti di e entidad.
Banda di esaki DIARIO a haya sa cu e medida aki tampoco ta contribui na e caida den e demanda cu e agencianan di viahe a raporta den e ultimo lunanan. Ademas, esaki ta causa disgusto cerca e usuarionan debi na e realizacion di e proceso di solicitud locual ta trece cune cu na final nan no lo viaha mas.

Aña pasa, e venezolanonan tabata haci e tramite aki un biaha so, pero awor nan lo mester ripiti e procedimento cada bez cu nan ta viaha. Antes tabata tin mester di un solicitud so sin importa e cantidad di viahenan cu nan lo haci.

Awor cada biaha cu e persona ta bay viaha, e lo tin cu haci e tramite aki na Comision di Administracion di Divisanan (CADIVI). Adicional na e proceso aki, e comision ta esun cu lo asigna e cantidad di dollar di acuerdo cu e destino y duracion di e viahe, aspecto cu tambe ta worde considera como algo nobo pa e viaheronan frecuente y pa e agencianan di viahe.

ARUBA Y CURAÇAO

Pa loke ta e islanan den Caribe, segun e medida nobo aki, si e destino ta Aruba of Curaçao of algun otro isla, pa un siman di estadia, e viahero lo haya 500 dollar pa cada persona cu ta viaha.
Por ripara cu e otorgamento di divisa aki no ta cubri e necesidadnan di e personanan, por ehemplo, di un grupo familiar cu tin pensa di bin Aruba, ya cu nan no lo por pasa un siman cu e cantidad di dollar aki.

Antes e personanan tabata viaha cu un asignacion completo di e cuponan. Kiermen cu si un persona tabata kier gasta 2500 dollar nan tabata por haci esey y no tabata tin ningun problema, awor esaki ta diferente.

EXCEPCIONNAN

Den e medidanan aki tin algun excepcion pa loke ta e otorgamento di divisanan, esaki dependiendo si nan tin como destino Merca, Mexico y destinonan cu mas di 8 ora di vuelo. Akinan, e viaheronan lo por gasta e suma di 2500 dollar reglamentario y ora cu ta trata di viahenan na Europa cu mas di 8 dia di duracion, e ciudadano venezolano lo haya 500 dollar mas pa un total di 3 mil dollar.

DISMINUCION BENTA

Segun datonan, durante e prome trimester di 2010 a ser raporta un disminucion no solamente pa e agencianan den e region pero pa tur agencia den e pais bisiña. E agencianan di viahe ta raporta un caida di entre un 80 y un 85 porciento di nan produccion y e razon di esaki ademas di e crisis economico na Venezuela tin awor e restriccion y falta di otorgamento di divisanan pa e personanan, ya cu den hopi caso esaki no ta cubri e necesidadnan di e ciudadanonan y debi na e razon aki nan ta dicidi pa no viaha.

E cantidad di dollarnan no ta cubri e costo di nan viahe. Na e momentonan aki tin hopi persona cu ta desconoce e medida nobo aki y esaki sigur ta un aspecto cu na Aruba mester tene na cuenta ora di papia di e mercado venezolano.

E unico speranza cu tin ta cu na e momentonan aki ta temporada di vakantie escolar tambe na Venezuela. Esaki lo por tin influencia pa e venezolanonan tuma e decision di bin Aruba, aunke sigur sigur e situacion aki di e cantidad di dollarnan lo limita hopi nan decision.