Gobierno ta pro un Conseho Constitucional cu por huzga diferencianan di opinion entre partnernan den Reino
Relaciona cu interpretacionnan di statuut…
ORANJESTAD (AAN): Relaciona cu e discusionnan cu tabata ser hiba den Eerste Kamer pa loke ta e futuro relacionnan den Reino Hulandes. Prome Minister Mike Eman a señala cu loke nan a presenta den Conseho di Minister ta cu mirando cu pa Reino funciona ariba diferente nivel, Conseho di Minister di Reino Hulandes lo tin bastante poder. E poder aki, a agrega, ta ehecuta a base di interpretacion di statuut. A bisa den un reunion di Conseho di Minister di Reino Hulandes algun luna pasa, cu a bira importante pa mira con ora cu tin diferencianan di interpretacion pa cu stipulacionnan di statuut cu ta bin un Conseho Constitucional, un organo independiente, cu obhetivamente por huzga diferencianan di opinion cu por existi entre partnernan di Reino.
E conseho constitucional aki, segun e mandatario, gobierno di Aruba ta kere cu mester bin. Esaki ta crea tambe na momento cu tin opinionnan distinto relaciona cu interpretacion di stipulacionnan di statuut cu no ta Raad van Staten cu tambe ta un organo politico consehero di e conseho di minister di Hulanda.
Esaki mester ta un instituto independiente cu obhetivamente por duna un veredicto riba diferencianan di opinion, a enfatiza. Gobierno ta kere cu esaki ta bay fortifica e funcionamento di Reino Hulandes y den hopi caso tambe lo fortifica e economia ora cu ta interpreta e stipulacionnan cu ta duna e espacio autonomo pa funciona den Reino Hulandes, a agrega.
Aruba no ta un di e partidonan cu ta biba cu e preocupacion cu e situacionnan di conflicto ta esunnan cu mester dirigi e forma di acerca Reino Hulandes. Tin mas oportunidadnan positivo cu tin cu enfatiza, cu keda stanca den e eventual conflictonan cu por surgi a base di interpretacionnan pa locual ta trata autonomia di e diferente paisnan.
Premier Eman a mustra cu e hecho cu tanto energia a wordo poni den e cambionan aki ta mustra cu na Hulanda tambe tin un interes pa Reino funciona den un forma mas constructivo.
