Home Editorial GRADONAN DI LADRONICIA

GRADONAN DI LADRONICIA

0
1
SHARE
- Advertisement -

jossy_mansur_picTa birando cada biaha mas notable na Aruba cu un degeneracion político severo ta desgraciando nos isla y ta rebasando tur limite y tur norma aceptable. Ya no ta trata solamente di corupcion o nepotismo, cu riba nan mes ta repugnante den grado mayor, sino cu awor nos ta mirando e surgimento di militantenan cu tin repinan diki di manteca riba nan cabeznan, y tog ta insisti di cana den solo sin ningun remordimento di consenshi, o temor di dirtimento. Na lugar di recapacita, di reconoce nan faltanan y ofrece Pueblo un “mea culpa” sincero, nan ta asumi actitudnan di agresividad inexplicable, si pa nada otro, djis pa mira si e lawai cu nan ta lanta contra hendenan drechi por hoga han propio criminalidad den nan plasnan di lodo.

Un Parlamentario, por ehemplo, mester ta un figura representativo, cu por ostenta un pasado di actuacionnan publico limpi, sin mancha di ningun sorto, pa e por sirbi su Pueblo honestamente y duna ehemplo na otronan cu su comportacion riba un nivel civiliza. Además, su preparacion pa ocupa e puesto mester ta visible y aprobable, pa e por sikiera compronde e mision cu Pueblo a encargue pa e ehecuta na su nomber.

Na Merca, por ehemplo nos conoce casonan di figuranan importante cu no por a ocupa puestonan publico pa motibo cu mas di dos decada anterior nan a comete algun pifia menor. Asina tabata tin un politico cu un trayectoria di mas di 25 aña di servicio publico cu no por a ocupa puestonan mas halto pasobra tempo cu e tabata na school el a huma marihuana. Pakico e severidad? Pasobra un miembro di Parlamento, di Senado o di Congreso mester ta un fuente di inspiracion pa esnan cu e ta representa, no un causante di repudio. Pueblo mester tin e confianza di sa cu ta trata di un figura ehemplar cu ta bay defende su interesnan dignamente, no un malandro disfraza di Parlamentario cu den diferente ocasion a comete un o mas acto bochornoso.

Parlamento di Aruba den mas di un ocasion tabata testigo di elementonan sin cuero di cara cu a presenta pa exhibi nan decadencia cu nan actitud o nan palabranan. Esey a crea y ta sigui crea un falta di respet enorme pa Parlamento di Aruba, un sala diseña pa tratamento di proyectonan di Ley y pa controla o coregi e malpasonan di Gobierno, no pa sirbi di circo pa e payasonan di pectakel, ni pa e maleantenan sin castigo cu ta viola su recintonan cu nan letanianan askeroso contra esnan cu por duna nan les di bon comportacion y decencia.

Actualmente tin algun Parlamentario cu no bal e nomber ey pasobra tin denuncianan serio contra nan, sin cu e partido den cual nan ta milita a tuma ni sikiera e molester di hala nan atencion y manda nan cera boca. Al contrario, mustrando un complicidad habitual y repudiable, e partido ta sigui aplaudi nan demostracionnan cayehero. Parce cu hasta e sentimento patrio di e partido ta cera den cashi bao yabi. Pasobra, si bo ta stima Aruba, si bo kier bo isla bon, bo ta percura pa e tin representantenan digno y respetable, no malandronan cu na cualke otro pais for di basta tempo caba lo tabata contemplando luna for di tras di trali.

Si bo studia e asunto for di un aspecto sociologico, bo ta compronde di biaha cu tur grupo social den tur epoca tin nan propio separacionnan social di acuerdo cu grado. Esey kier meen cu e posicion cu e miembronan di e grupo ta ocupa ta ser determina di acuerdo cu un escala di balornan, o falta di nan! Mescos cu antiguamente bo tabata haya e trapi social cu ta cuminza cu plebe y ta culmina cu nobleza, awendia bo ta haya cu ladronnan tambe tin nan escalafonnan di rango. Un ladron di banco, por ehemplo cu a horta 20 miyon di dolar no ta cay den e mesun categoria cu un ladron di placa los. E prome ta un ladron refina; e di dos un simple ratero. Y di e ultimonan aki tin varios den Parlamento!

- Advertisement -

1 COMMENT

  1. Pero kico a para cu e investigacion “cientifico” cual Hulanda mester a efectua despues di eleccion anto? Elo bay tuma lugar ainda? Of ya e ta andando caba? Personalmente mi ta kere cu e bocoton di e lidernan y donjonan di mep ainda ta bibo bibo, pasobra nan lo sa caba cu nada lo no bay pasa nan tog!!!Si gobierno no ta specifico den e asunto aki, e “colebra mepismo” lo bolbe lamta su cabez venenoso atrobe. Un di e tareanan di nos gobierno nobo lo mester ta tambe, di procura cu e “mepismo crioyo” aki mester caba pa semper. E mentalidad aki simplemente ta fatal pa un desaroyo sano di nos pueblo y e NO A MURI CU E 12-8!!!!!!Ta pesey e “investigacion Hulandez” MESTER tuma lugar!

DUNA COMENTARIO

Please enter your comment!
Please enter your name here