Home Editorial HENDRIK SEFERINO CROES

HENDRIK SEFERINO CROES

257
0
SHARE
- Advertisement -

jossy_mansur_pic     Durante e tratamento di e caso cu mi a lanta contra Edmond relaciona cu su acusacion absurdo cu mi ta den narcotrafico y labamento di placa, su abogado, e narco-Ministro di MEP, Hendrik Seferino Croes, a presenta (manera di custumbra), cu e buki di Olivier, y el a lesa bay gol for di dje, comosifuera e tabata citando for di Biblia!
No, Mo Diek, bo ta masha ekiboca, pasobra e buki ey ta skirbi pa un estafador cu a bay cera den diferente ocasion na diferente pais, cu a gaña sin misericordia den su buki, y a acusami, entre otro cos, di ta meti tambe den e trafico di arma!
         Pero Hendrik, bo no a tuma algun tempo pa averigua cu cualke testimonio cu e por a inventa ta mancha? Di con bo no ta busca e traficantenan di arma cerca dos ex-Parlamentario di MEP? Bo mes no por a nota e ridiculez di dje ora cu el a bisa cu na mi cas mi tin un casita na entrada cu un guardia arma cu machine-gun? Cu mi ta core den un auto deportivo di luho? Cu mi ta asina poderoso cu un solo yamada di mi na e Presidente di Merca a pone un fin na tur e investigacion cu el a priminti nan cu e ta bay haci pa entregami na nan? Tende, shon, e tabata tras di placa, y abo, siendo Ministro di Husticia e tempo ey, casi sigur a encurashe pa e skirbi cualke buki contra mi.

         Awor, ami si por yamabo un Narcotraficante sin temor di ta ekiboca. Bo sa pakico? Pasobra ta abo y Nel a autoriza e despacho mas grandi di droga conoci te awor cu a sali for di Aruba rumbo pa Hulanda, conoci como Cargo Zaak! E 2500 kilo di marihuana cu a bay for di Savaneta pa Hulanda a ser bendi riba caya, ningun hende a ser aresta, y e placa cu a drenta di e benta di droga ey a ser reparti entre diferente departamento y persona.

        E confirmacion a bin di bo mes y di Nel, ora cu na Radio boso a bisa cu si mester bolbe hacie, boso lo hacie. Abo ta un abogado y bo mester ta na altura cu den nos Leynan no tin narcotraficacion legal y narcotraficacion ilegal! Si bo participa den cualke forma di narcotrafico, bo ta un narcotraficante, pesey mi por grita den bo horea: bo ta un narcotraficante!

        Abo, Hendrik, ta e ultimo persona na mundo pa bin cu e acusacionnan ey contra cualke persona djis pa satisface e odio inmenso cu ta biba den bo! Bo sa pakico? Pasobra abo tabata relaciona directamente, amigalmente, como abogado y probable socio di e narcotraficantenan mas grandi conoci te awor den e area aki. No ta abo tabata un di esnan cu tabata busca Ocando Paz for di aeropuerto cu su maletanan preto yen di placa di droga recogi riba e cayanan di Fort Lauderdale, pa bay conta nan den e suite riba e di 7 piso di Concorde Hotel? No ta abo, como Ministro di Husticia, a manda un orden skirbi na man pa e Fiscalnan di e tempo ey, Van Wijland y Hoogland, ordenando nan pa pone un narcotraficante (Sanchez) cu tabata den prison den libertad? No ta abo a permiti Cuntrera bolbe drenta Aruba siendo cu e tabata prohibi pa haci esey? No ta abo a ser acusa den NRC Handelsblad di ta meti den droga cu Bouterse, y te awe bo no a keha ni e corant ni e periodista cu a acusabo directamente y publicamente? Y asina mi por sigui te yena henter e corant aki cu bo relacionnan y envolvimento cu droga y cu e narcotaficantenan meti den e negoshi askeroso ey.

      Bo a referi na Luis, mi ruman, comosifuera algun di nos lo a sali na su defensa pa loke el a admiti di a haci! Ta duel nos cu el a hacie pasobra e ta keda nos ruman, y ta duel nos cu e ta den prison, pero busca algun relacion cu cualke otro di nos ta tipico di e enfermedad di odio cu tin bo cerebro carcomi.

        E veneno cu ta core den bo sanger no ta lagabo pensa sin amargura, y como cu ta ami a exponebo den tur bo bagamunderianan y relacionnan cu e hendenan ey di baho mundo, bo kier atachami cada biaha cu bo haya e oportunidad den Corte, di cosnan cu nunca mi a yega di haci, amen di cualke buki o raport o cualke otro mentira aki o den medionan internacional vicia cu boso mentiranan.

       Bo sa pakico nan ta mentiranan flagrante? Pasobra nunca mi a yega di ser interoga, deteni o hiba dilanti di Huez na ningun parti di mundo pa cualke asunto relaciona cu droga o labamento di placa. Pesey mi ta bay Merca tur ora cu frente na laira y sin ningun temor di ser sigui o molostia. Aya nan sa masha bon kico ta kico, y con abo y otronan den MEP, especialmente Nel y Martin Ras a yena e autoridadnan Mericano cu raportnan insostenible den cualke Corte di Husticia, djis pa motibonan politico.

Dia cu MEP a nombrabo nan Ministro di Husticia, loke nan a haci ta pone un Narco-Ministro pa prome biaha den Reino, den un posicion di poder, cu e speranza cu boso ta bay caba cu nos tur, cu boso ta considera boso enemigonan. Pero, MEP no a conta cu bo record, cu bo actonan descabeya, cu bo odio y bo traicion contra Aruba.

        Bo ta corda e badge di DISIP cu bo a acepta como Comisario General di e cuerpo policial ey? No lo tabata nada si bo no tabata ocupando na e momento ey e posicion di Ministro di Husticia den Reino Hulandes. Bo a duna un huramento na Venezuela cu ta calificabo como un traidor. Na cualke otro pais nan lo a fusilabo, pero MEP no solamente a bira cara pa e desfachatez ey, sino cu nan a sigui permitibo comete bo barbaridadnan, con tal cu bo tabata persegui nan contrincantenan político. Cu berdad o cu mentira, esey no tabata importante pa nan, con tal cu bo por a sigui scupi bo odio contra e politiconan y miembronan di prensa cu no tabata na boso amen.

        Como cu bo a provoca sin cu mi por a contestabo den Corte, for di Dialuna padilanti mi ta bay dunabo mi contesta. Spera lo peor, pasobra mi no ta bay limitami na Ocando, Sanchez, Bermudez, Owell, Cuntrera of e otronan riba bo lista di amigonan o socionan so. Y den e tanda di publicacionnan ey, acompaña pa documentonan incuestionablemente legitimo, e Pueblonan di Aruba y di mundo ta bay mira bo berdadero cara, esun di un narcotraficante y traidor repugnante!

- Advertisement -

DUNA COMENTARIO

Please enter your comment!
Please enter your name here