Inclui parke nacional Arikok riba e “World Heritage List” di Unesco
Minister Michelle Hooyboer-Winklaar a entrega peticion oficial pa
ORANJESTAD (AAN): Recientemente Minister di Cultura, Minister Michelle Hooyboer-Winklaar a entrega un peticion oficial na pa por inclui nos Parke Nacional Arikok riba e “World Heritage List” di UNESCO. Aruba como parti di Reino Hulandes a entrega e peticion oficial na Minister di Cultura di Hulanda. Como cu Hulanda ta screen cada peticion debidamente, a manda e consehero di e Ministerio di Cultura di Hulanda, Marcel Barnard, pa haci un bishita di inspeccion y papia cu entre otro cu Minister di Turismo Otmar Oduber, cu Minister encarga cu Parke Nacional Arikok y Museo Arquelogico esta Minister Michelle Hooyboer-Winklaar y tambe cu e Directiva di Parke Nacional Arikok.
Sr. Marcel Barnard a bishita Parke bou guia di Sr. Diego Marquez, kende a sa di mustra e representante di Gobierno di Hulanda tur nos rikezanan natural y sin lubida e parti historico. Mester menciona cu durante e recorido den fin di siman, Sr. Marcel Barnard a keda masha impresiona di nos parke, di con bon nos tin’e cuida y conserva y di nos plannan pa futuro.
Minister Hooyboer a keda masha satisfecho cu e bishita aki y a expresa cu esaki ta duna nos speranza cu Aruba lo por worde inclui riba e lista di “World Heritage”. Hecho ta cu incluyendo Parke Nacional Arikok riba e lista ya menciona, lo habri un cantidad di oportunidadnan adicional pa futuro di e parke.
Y esaki sin duda ta forma parti di e maneho di Minister Michelle Hooyboer-Winklaar kende for di un inicio di su periodo di gobernacion a anuncia di lo traha duro pa hiba nos parke nacional na e siguiente nivel.
Riba e foto adhunto por aprecia momento cu Minister Hooyboer-Winklaar ta regala Sr. Marcel Barnard e buki “Bouwen op de Wind”. E mandarario a informa e representante di Gobierno Hulandes cu e Gobierno aki ta haciendo tur lo posibel pa Parke Nacional Arikok worde poni riba e “World Heritage List”, pero tambe pa nos musica autentico di “Dande” tambe worde poni riba e lista di “World Heritage Non-Tangibel”.
Dentro di poco lo bay registra den e lista oficial di Monumento diferente parti di Parke Nacional Arikok. tambe diferente parti di Aruba su naturaleza, manera Casibari y otro sitionan pa salvaguardia nan pa nos futuro generacionnan.
