Home General Investigacion di Compania Ernst & Young ta indica iregularidadnan na granel

Investigacion di Compania Ernst & Young ta indica iregularidadnan na granel

1
1
SHARE
- Advertisement -

Lotto pa Deporte: e saga ta continua…
E caha di Pandora a habri y tur desaster, disturbio y fraude ta bira publico
ORANJESTAD(AAN): E raport di e compania di accountant Ernst & Young a keda cla y e spotlight dirigi riba esaki, ta trece na claridad un monton di iregularidad y asuntonan fraudulento cometi den Fundacion Lotto pa Deporte door di hende tanto eyden mes como pafo, ta pone curpa di hende drechi grima. Con por ta posibel cu hende den posicion halto na unda etica mester ta prioridad number un, ta perde tur nocion di loke ta bon y ta bay over na “haci cosnan fuera de lo normal” pa genera placa pa nan mes y nan famia. Placa cu nan no tin derecho riba dje.
Manera DIARIO a publica caba na varios occasion, loke tabata pasa den Fundacion Lotto pa Deporte ta sobrepasa tur imaginacion y sentido comun. Negoshinan cu a worde lanta di un dia pa otro door di Edmond Croes, ruman di e director Endy Croes cu e solo meta pa saca placa bruto di FLPD.

Hasta placa a worde deposita na banco riba cuenta priva pa trabao haci door di cierto negoshi cu ni a worde lanta mes na KvK. Chequenan cu a worde cambia di fecha y asina por sigui. Den e dianan nos dilanti nos lo relata ampliamente riba e “modus operandi” di famia Croes den FLPD con pa na un forma facil saca placa di FLPD.

E trabao di investigacion a worde complica door di e mal administracion cu tabata tin den FLPD door di e director Endy Croes, kende a laga tur cos pa nan cuenta. Asina a sali na cla for di e administracion di FLPD cu placa a worde pasa via banco riba cuentanan personal di Edmond Croes y tambe cu chequenan riba nomber di Edmond Croes a worde paga.

Pero…for di e administracion di FLPD no semper por saca afor pakico e pagonan aki a worde haci (cua trabao?) ya cu na 2008 y 2009 FLPD tabata haci negoshi cu un cantidad di compania “existente” y “no-existente” di Edmond Croes. Ta obvio cu aki cosnan tabata tuma lugar cu no tabata bay segun reglanan vigente.

Un di e cantidad di cosnan straño cu tambe a keda constata ta cu hopi number di cheque entre 2008 y 2009 no tey mas y no ta concorda cu e extractonan di banco. Despues di a haci un investigacion mas leu a resulta cu cierto cheque a worde cobra si, pero cu nan no a worde registra den e sistema di registracion di Accpacc. Lo mester haci un investigacion mas profundo pa haya sa kico a pasa cu e chequenan (placa) aki.

E diferente companianan di Edmond Croes, ruman di Endy Croes, cu tabata haci negoshi cu FLPD a gana placa grandi for di FLPD. Den e dianan nos dilanti lo trece nan tur un pa un dilanti pa di e forma aki e lector mes por saca su cuenta y constata cu loke a pasa den FLPD ta manera nan ta bisa na Hulandes “bij de beesten af”.

Asuntonan notorio cu luz di dia no por soporta a tuma lugar eyden cu bendi con di e director Endy Croes, kende como accionista di diferente negoshi di su ruman Edmond a probecha grandemente di placa di FLPD. E saga ta continua…

- Advertisement -

1 COMMENT

  1. E mucha nan ei ta ladron,…

    Bon e malamaña di e muchanan ei, ta un malesa e ta di famia, of ta mira mes nan no por mira plaka wowo, of ta Nelson (Nel) Oduber y Rudolfo Hyacinhto Croes nan kier imita???

    sera nan benta jabi afo pa asina Pueblo por drumi tranquil

DUNA COMENTARIO

Please enter your comment!
Please enter your name here