Jerrick Francees reforsando Travel Team di West Boynton Lightning di Florida
ORANJESTAD (AAN)— E hoben pelotero di Aruba cu ta hungando den Travel Team di Florida a recibi un invitacion pa reforsa e equipo di West Boynton Lightning den e ultimo torneo di Triple Crown Sport den SF State Championship 2010 cu a tuma lugar dianan 3-5 di juli pasa na Coral Springs Florida. Jerrick Francees ta un hungador di Lake Worth Warriors for di aña 2009 y awor despues cu el a hunga na luna di mei ultimo den USSSA na Ft Pierce cu e equipo di Warriors, e manager di Lightning a wak su prestacion y a aserca mayornan di Jerrick pa asina bai hunga na Disney den un tournament organisa pa AUU y tambe pa Triple Crown Sports. Durante e prome wega diasabra atardi Jerrick a sali como pitcher na unda el a domina bon den dos inning y despues a recibi un relevo pa asina nan por a spaar e inningnan pa e siguiente weganan durante e weekend, cu ta reglamenta cu un pelotero mag tira un total di 6 inning pa e weekend / tournament.
Manera semper su bate a keda cayente na momento cu na dos ocacion a conecta batasonan di poder di hit. Remarcabel tabata ta cu durante e tres weganan di e tournament Jerrick tabata batiendo di 1000 punto, cu tabata 5 hit den 5 hit oficial, y tambe un hugada di doble play na unda Jerrick como e short stop a saca un doble play den jugada cu e fanaticada a keda asombra den e publico y e coach y manager di team.
E team a gana tur wega y a yega te final na unda cu den final nan a cai venci contra e team di Pirañaz, cu a gana cu e score di 10-5. E team di Lightning a keda na di dos lugar como e sub campeonnan.
Sigur un biaha mas Jerrick Francees a laga Aruba su nomber resona den Florida, hasiendo un tremendo trabao. Na Aruba Jerrick ta hungando den e equipo di Minor League di Benjamin Security cu ta na prome lugar den Aruba Center Little League cu lo ta hungando sigur 3 wega mas pa e temporada aki, cu lo bira weganan vs Stars Organization y Domino’s Pizza. Aruba por keda pendiente di Jerrick su weganan internacional den baseball pa e proximo lunanan.
