Jossy Mansur y Edmond Croes a yega na un acuerdo
ORANJESTAD(AAN): Diahuebs na corte a tuma lugar un caso sumario cu Director y Hefe di DIARIO Jossy Mansur a entama contra Solo di Pueblo y su director Edmond Croes. Señor Mansur a entama e caso, pa motibo cu recientemente Solo di Pueblo a publica articulonan den cual a wordo bisa cu Mansur ta un persona conoci pa activo den labamento di placa y cu e tabata involucra cu traficacion di droga. E caso tabata pues pa Solo di Pueblo rectifica loke nan a publica.
Señor Mansur a wordo representa pa abogado Milko Baiz, mientras cu Edmond Croes a wordo representa pa abogadonan Hendrik Croes y Anthony Ruiz. Mr. Baiz a cuminza na splica cu señor Croes lo a rabia pa e publicacionnan di DIARIO cu tin di haber cu e investigacion di Ernst & Young riba ruman homber di Edmond Croes den su funcion como director di Lotto Pa Deporte.
DIARIO a publica cu e rapport di Ernst & Young a indica cu hopi iregularidad a tuma lugar bao di maneho di Endy Croes kende ta ruman homber di Edmond, mientras cu companianan di Edmond lo a gana mas di 5 miyon florin door di entre otro aviso y proyectonan pa Fundacion Lotto Pa Deporte.
Segun Baiz, door di esey Edmond a publica den Solo di Pueblo, articulonan negativo contra Jossy Mansur. El a splica cu tur hende tin libertad di expresion, pero te cierto limite.
Si bo publica algo contra un persona como un hecho cu a sosode, bo mester tin prueba pa comproba cu esaki ta berdad, sino bo ta daña nomber di un persona sin base.
E articulonan di e corant di Santa Cruz a bay asina leu te hasta pa bisa cu Jossy Mansur cu su participacion na traficacion di droga, e causa e problema di adiccion na Aruba,.
Tur esaki sin base of prueba.
A cambio segun Baiz, loke DIARIO a publica tocante e iregularidadnan cu a tuma lugar den Lotto Pa Deporte, ta base riba un rapport di investigacion di Ernst & Young.
Abogado Hendrik Croes a cuminza menciona varios asunto contra Director di DIARIO, basa riba un buki skirbi na 1995, den cual tin para cu un persona trahando ‘undercover’, lo a papia cu un tal “M” y M lo a splike tur cos di su operacionnan di labamento di placa.
E abogado a splica cu “M” ta Jossy Mansur y cu el a wordo condena pa traficacion di droga y labamento di placa. El a bisa tambe cu Mansur su visa pa Merca a wordo nenga, pa e motibo aki.
E realidad ta cu Mansur frecuentemente ta biaha pa Merca y nunca el a wordo condena pa labamento di placa of cualkier otro crimen.
Mansur mes a splica huez esey durante e caso den corte. Un persona cu wordo condena pa e tipo di crimennan ey, lo no por drenta Merca manera señor Mansur ta hasi.
Mansur a bisa huez tambe cu e supuesto persona undercover di fam Olivier cu a contribui na skirbimento di e buki, actualmente ta cera na Alemania pa a comete fraude.
Huez na dado momento a papia cu ambos hefe di corant y a puntra nan si nan lo pro yega na un entendimento, pa e no mester duna un veredicto den e caso aki. Señor Mansur a bisa cu e no tin problema pa ambos stop di acusa otro den corant.
Edmond Croes su deseo tabata pa DIARIO y Jossy Mansur stop di yame y su famia pa ladron y pa ta corupto. El a bisa cu hopi caminda unda cu e bay, nan ta yame pa ladron, basa riba loke nan a lesa den DIARIO.
Mansur na su turno a bisa huez cu e no tin problema di yega na un areglo, sinembargo importante pe tabata tambe pa Edmond Croes y Solo di Pueblo publica cu no tin ningun indicacion cu Jossy Mansur ta un labador di placa of cu e ta un narcotraficante, pasobra hamas el a participa den e actonan criminal aki y logicamente hamas el a wordo condena pa esaki.
Despues cu tur dos banda a haya e oportunidad pa pensa, nan a yega na un entendimento unda cu señor Croes y señor Mansur lo manda email pa otro, den cual nan lo evalua kico nan lo publica den nan corant.
E intencion ta pues pa algo wordo skirbi, unda cu Solo di Pueblo lo bisa cu nan no tin ningun prueba cu Jossy Mansur a yega di laba placa of trafica droga y DIARIO lo publica pues cu e no tin prueba cu Edmond Croes ta corupto y ladron.
