Diario Online

Loke F.T.A ta cuestiona ta cu e trahadonan lo wordo paga 5 florin menos pa ora!

Publication: Friday, 30 July 2010. Categoria: General

Rudy Geerman tocante reapertura Valero:
“Pa haci mesun trabao bao mesun circumstancianan peligroso”
ORANJETAD (AAN) — Den entrevista cu nos redaccion a tene cu presidente di F.T.A, señor Rudy Geerman, e topico “reapertura di e refineria” tambe a bin acerca unda nos a puntre si e trahadornan cu a wordo tuma den servicio ta satisfecho. Geerman ta considera cu “ta satisfecho” ta algo relativo. Esaki den sentido cu loke pa algun trahador ta bon, pa otronan no ta suficiente.
Locual F.T.A a trece dilanti ta e voz di reclamo cu ex-miembronan di e sindicato cu ta traha den e refineria ta trece dilanti.
Geerman a señala cu locual a tuma lugar no ta corecto unda cu ta wordo probecha di un situacion. E kiermen, cu na momento cu Valero a dicidi di stop su operacion e tabata sa cu lo yega momento cu e lo bolbe habri.

Nan a stop un operacion cu den menos di ocho luna nan a bolbe habri e planta, y e ora ey tin e situacion di hopi hende sin trabao, ya cu no tin otro sector similar na e refineria na nos Isla, y automaticamente desempleo a surgi.

Loke mas F.T.A ta cuestiona ta cu trahadornan cu seis pa siete luna pasa tabata gana cierto tarifa pa ora, awor den e mesun caminda, haciendo mesun trabao bao di e mesun circumstancianan peligroso di e refineria, awor tin cu bay gana 5 florin menos pa ora.

Esaki ta loke trahadornan ta cuestiona y locual F.T.A a trece dilanti, y cu a ser tuma na malo comosifuera cu e sindicato ta contra e apertura back di e refineria. “ Ningun momento! F.T.A ta esun prome cu a bisa cu ta yega un momento cu e refineria mester a tuma un decision y cu nos ta kere cu pa loke ta e economia di Pais Aruba y di San Nicolas particularmente, ta necesario.

Nos ta di San Nicolas, nos organizacion ta ubica akinan, y nos sa cu na momento cu e refineria a stop di funciona kico esey a nifica pa e economia di e parti pariba aki di nos pais.

Nos ta kere den e refineria pero tampoco por ta asina cu ta haci cada bez e tipo di maniobranan aki y e consecuencianan ta keda pa e trahadornan”, Rudy Geerman a señala.