Mentor y comision di recepcion lo ricibi studiantenan dialuna y sigui pa nan destinacion
ORANJSTAD (AAN):–No solamente aki a Aruba preparacionnan ta wordo haci pa e biahe di un grupo di hoben di Aruba cu ta bay sigui cu nan studionan avanza na Hulanda. Na Hulanda, specificamente na Cas di Aruba tambe basta trabou a wordo haci pa ricibi e hobennan dialuna,2 di augustus, 2010, na momento cu nan pisa suela di Hulanda. E trabou pa ricibi e studiantenan, segun mr. Desiree Croes kende lo biaha cu e hobennan tambe diadomingo, a cuminsa for di un luna pasa. A reuni cu e 14 mentornan di e diferente ciudadnan pa mira kico lo bay haci, pasobra ta e mentornan lo bay percura pa e hobennan aki ora cu nan yega Hulanda.
Dialuna na aeropuerto caba cada studiante lo bay cu e mentor di e ciudad unda cu e lo bay biba y studia. Pa haci e trabou aki, e mentor lo tin su comision di recepcion cu ta consisti tambe di studiantenan cu tin algun tempo caba na Hulanda pa yuda esnan hoben aclimatisa nan mes.
Pa ora cu nan yega, nan lo mester tin nan camber caba.
Segun mr. Croes a conta nos, e buscamento di camber ta un responsabilidad di e studiante y su mayornan na prome luga. Cas di Aruba ta duna su cooperacion hunto cu e mentornan. E ta na altura cu tin masha problema pa haya camber ultimo añanan, cual ta e motibo cu for di momento cu el a yega aña pasa, a cuminsa traha riba esaki.
Tin cierto areanan caminda camber ta masha schaars mes. Pesey semper nan mensahe pafo ta pa e hobennan cu kier bay studia na Hulanda, cuminsa for di un aña prome, tuma contacto cu Cas di Aruba pa haya sa bou di cual mentor lo bay cay y e ta yuda den e procedura pa busca cas.
