Diario Online

Muher stranhero ta sigui labora na varios empresa ta hortando

Publication: Saturday, 31 July 2010. Categoria: General

Mientras cu Recherche ta sinta man cruza…
ORANJESTAD (AAN): El a logra descubri un forma facil pa horta placa na e negoshinan unda e ta labora! Na un negoshi unda el a labora anteriormente, el a logra comete desfalco di como 5 cifra. El a worde descubri, y a perde trabao. El a haya labor atrobe na un Restaurant na Playa, y aki atrobe e no a lubida su mala-maya, y a bolbe horta. Na final di luna di Mei, e muher aki a worde descubri y a perde su trabao. Mesora keho di desfalco a worde entrega na autoridad local.
Pero te cu awor cu Augustus a yega, ainda nada a worde haci! E mesun Cuerpo di Recherche cu no por soluciona ni robo di Wasmachine, lo por soluciona un caso di Desfalco? Ni papia mes di desaparicion di Natalee Holloway.
Keto bay e ex-Manager di Restaurant aki ta liber, y pa colmo ta laborando na un otro negoshi. Mirando su track-record di ultimo añanan… Dios so lo sa kico e muher Peruano aki lo ta haciendo.

Y na e Restaurant na Playa? El a horta un suma di 6-cifra! Un desfalco grandi sin duda alguno.
Aunke gerencia di e Restaurant a suministra Recherche cu tur prueba di Accounting, tur prueba di Computer, keto bay nada a worde haci. Ministerio Publico en general ta sinta riba un rust, cu tur e materialnan di prueba ta recogiendo stof di sinta den lachi.

Asina evidencianan ta bay perdi, y pueblo ta sigui perde confianza den Ministerio Publico y den Cuerpo di Recherche. Acaso e momento a yega pa manda busca Hulandesnan bek pa traha den Cuerpo di Recherche como debe ser? Pasobra si cualkier ciudadano yama pa check con ta bayendo cu nan caso, e contesta clasico ta: “Bo ta kere cu bo caso so nos ta investigando?”

DIARIO a haya sa pa colmo, cu esey ta e motibo di con varios comerciante ya no ta ni denuncia e tipo di casonan aki. Pasobra nan ta pensa, cu e placa mes cu a worde horta di nan… nan lo no por haya bek. Anto si acaso nan denuncia algo na Recherche of Ministerio Publico… ta tempo y pasenshi perdi.

Halto Comisario nobo, Dolfi Richardson, tin hopi cos di cambia aki, pasobra pueblo ta sigui perde confianza den e habilidad di cierto departamento di haci algo.