Home Politica No tin tempo pa perde cu definicion di pobreza

No tin tempo pa perde cu definicion di pobreza

0
0
SHARE
- Advertisement -

Rene Herdé (AVP)
Gobierno di AVP a cuminsa actua dentro di prome 100 dia manera palabra cu pueblo!
ORANJESTAD (AAN): Pa añanan largo gobierno di MEP a nenga cu tin pobreza na Aruba.Ta storia di AVP esakinan tabata. E realidad cruel di pobreza den nos comunidad a hasta empeora den e ultimo cuatro aña di MEP, ora no solamente a sigui nenga cu tin pobreza, pero a bay di e leu ey pa kita onderstand di hende cu no por a traha.


Sinta den nan oficinanan gobierno di MEP a dicidi cu e problema di pobreza ta cu hende pober no por fiha prioridadnan den con ta usa nan placa. Pesey e minister di asuntonan social a cuminsa manda hende tuma curso pa sina ‘budgeteer’! Lubidando cu ta e placa mes nan no tin.

Y ora e discucion a bira fuerte y AVP a mustra riba e pobreza den nos pueblo, MEP a laga su departamento bin declara cu loke falta ta un bon deficicion di pobreza. Pasobra loke ta pobreza na Hulanda of Merca, no ta mescos cu pobreza na Aruba.

Di e forma aki MEP a scohe pa sconde tras di palabranan fofo y sigui haci nada pa esnan cu poco of nada di entrada. Na ultimo momento, pa purba scapa cara MEP a dicidi di bay aumenta e salario minimo sin sigui e caminda legal, sin consulta cu ningun organizacion y sin tene cuenta cu e situacion malo den economia cu nan mes a yuda crea.

Di e forma aki creando problema pa companianan chikito tambe. Y tur esey durante di un periodo cu gobierno y e ministernan conserni tabata tin tur e tempo, tur e conocemento, tur e echonan di realidad di bida di hende den nos comunidad y tur e placa, pa yuda esnan den pobreza.

Enbez di haci algo na e situacion social doloroso di hopi famia di cas na Aruba, MEP a scohe pa gasta placa di pueblo (1.8 biyon Florin extra), yuda solamente esnan cu ta serca di nan (“friends and family”), neglisha e realidad (“no tin pobreza na Aruba”) y sconde tras palabranan (“no tin un definision di kico ta pobreza”). Mientrastanto nos hendenan tabata sufri!

MANEHO DI CAMBIO

Manera gobierno a cambia, gabinete Mike Eman y e diferente ministernan, en especial e minister di Asuntonan Social, a cuminsa haci loke AVP a bisa den campaña: yuda directamente esnan cu ta haya onderstand cu un aumento di 25%; yuda e famianan cu tin yiu ta bay school cu 100 Florin extra tur luna; creaccion di un seccion na Departamento di Asuntonan Social, cu ta atende directamente cu asuntonan di pobreza na Aruba; creaccion di programanan pa kita e obstaculonan cu ta stroba pa hende por bay traha, manera cuido pa muchanan den oranan di trabao of school; cuminsa cu un programa di “balansa nobo” pa yuda esnan den problema financiero; traha hunto cu “Fundacion pa nos Comunidad” pa yuda esnan cu worde afecta pa e consecuencianan di pobreza cu cuminda, meubel pa cas, paña, etc.

Pero esey no ta tur. Ta bay cambia e ley di onderstand cu enbez di yuda hende biba normal, a empeora nan situacion. Tur esaki e gobierno di MEP tambe por a haci, pero a nenga y a scohe pa sconde tras di e “falta di un definicion” di pobreza.

ACCION COORDINA

Loke gabinete Eman y minister Michelle Hooyboer-Winklaar a haci ta djie e comienso di e maneho coherente contra pobreza. Den contesta na parlamento el a indica cu e ta bay registra pobreza den nos pais, pa nos sa ta ken, na unda y con miho pa yuda e hendenan aki sali for di pobreza. Pero ningun momento esaki a stroba di tuma accion mes ora manera nan a haci. Loke ta sigui awor ta un maneho integral cu lo inclui enseñansa, ayudo social temporal, asistencia den busca trabao y tene trabao, sigui bay dilanti y biba un bida stabiel.

Pasobra AVP ta convenci cu hende por y kier ta responsabel pa nan mes. Y trabao ta duna hende e oportunidad ey pa wak pa nan mes y nan famia. Tin biaha hende mester di un ayudo pa yega eynan y ta esey e maneho lo yuda haci tambe. Esaki ta loke AVP a priminti y esaki ta loke AVP ta haci!

- Advertisement -

DUNA COMENTARIO

Please enter your comment!
Please enter your name here