Polis a rescata baby cu a keda cera den auto dilanti Voogdijraad
Basta rato criatura a keda cera den auto cayente…
ORANJESTAD (AAN): Dialuna mainta a ser raporta un caso unda un mucha chikito tabata envolvi. Segun informacion, e mama di e criatura lo a drenta Voogdijraad y a laga e mucha den auto su so. Pa un motibo of otro, pa descuido of negligencia, e auto a cera na lock y tambe e bentanan tabata cera mientras cu e mucha chikito tabata aden. Na dado momento, un persona den cercania lo a ripara e mucha den e auto y a notifica esaki na polis.
Akinan ora patruya a yega nan a constata cu e baby tabata den e vehiculo y a pidi asistencia di un experto pa por a habri e auto y rescata e criatura cu tabata sofocando y birando malo.
Aparentemente ni specialista por a habri e auto y ta pesey cu polis mes a bay over na kibra e glas di e bentana chikito cu consecuencia cu el a corta su man.
E heroico polis, aunke herida, a logra rescata e pober mucha cu pa basta rato tabata den e auto wardando.
Ambulans a atende e criatura y hibe hospital den compania di su mama pa mas atencion ya cu el a soporta hopi calor, tabata deshidrata y birando malo.
Mas informe cu DIARIO a haya ta cu mientras cu esaki a sosode, e tata di e mucha a haya sa loke tabata pasando cu su yiu y a presenta na e sitio. Aparentemente tambe lo a surgi un discusion entre mama y tata di e mucha pa locual tambe polis mester a interveni.
