Recordando Sra. Jeanine Jansen, ex-presidente RCA Lifida y ex-miembro di directiva di RCA
ORANJESTAD (AAN)- Awe lo hiba sra. Jeanine Jansen na su ultimo lugar di sosiego. Na bida sra. Jeanine Jansen tabata un persona cu a dedica hopi tempo na e deporte di futbol, specialmente e futbol infantil na unda di 2003 te cu 2007 e tabata presidente di e tricolornan di Solito esta RCA Lifida. Pero su amor pa RCA ta data for di mucho mas prome, esaki den añanan ochenta na unda como hoben e tabata compaña su querido papa Fenchi Jansen, den feliz memoria, un pilar den RCA, bishitando e club y su actividadnan.
Su pasion y amor pa e tri-colornan di Solito a bira uno bisto. Ora su propio dos yui hombernan Jean Luc y Lu-Jean a bira grandi y cuminsa practica e deporte di futbol, su envolvimento na tur actividad a bira mas grandi.
Unda cu e tricolornan por a hunga eynan Jeanine tabata ta, sea na cas of ariba tereno di e contrincante. Numeroso diasabra di wega, Jeanine tabata pasa na tereno di bala y apoya e equiponan di futbol di RCA, uno pa uno.
Ta ken no ta corda e palabranan “shushushu-shuuuuuu”, esaki Jeanine tabata usa ora cu a contrincante ta haci su atake cerca di e porteria defendi pa RCA, un señal pa e bala bay for di e area peligroso, un sonido cu nos no lo tende mas, pero lo ser recorda den nos curazon.
Mirando Jeanine su trayectoria den e futbol infantil como tambe grandi nos a pidi algun persona den e mundo di futbol pa describi pa nos con nan a conoce e persona di Jeanine Jansen.
Veron Albertsz(miembro di RCA y amigo di Jeanine)
“E band cu RCA tabata uno grandi, prome cu su yuinan a cuminsa hunga. Jeanine a hasta pasa den e etapa di ’86, un aña historico, pa RCA.
Como persona, semper e tabatin un momento pa tur hungado, e trato humano ta algo cu a sobresali. Jeanine tabata presidente di e directiva di Lifida, despues el a bay directiva grandi, pero semper Lifida a keda den su curazon, un persona exigente pa logra un bon resultado.
Mayoria di e hungadornan actual di RCA hoofdklas a pasa bou di Jeanine. Su persona a sostene RCA den bon y den mal momento. RCA sigur a perde un pilar den Jeanine, un trahado manera Jeanine ta dificil pa bo haya, hopi club tabata envidia RCA pa ta bon den su organisacion. Su amistad tabata grandi, un parti di RCA a bay cune, su yuinan por bisa kico Jeanine a nifica pa RCA”
Editha Lake-Wolter(presidente di Dakota Lifida)
“Nos conoce Jeanine di RCA trahando incansabel pa derecho di su muchanan di RCA, nan ta su yiu nan! Practicamente e famia aki ta biba pa nan Club di futbol. Pa hopi aña sigi nos ta enfrenta otro keto bay den LIFIDA, dos rival nan riba tereno di bala. Sin conta e wega nan di división mayor y di junioren, Jeanine Semper ta tey pa su club” PA BIDA. Ora Dakota tin di hunga ariba veld di RCA, e ta acerca nos y puntra si tur cos ta OK.
Un cos ami personalmente ta bisa sinceramente di Jeanine: Si bo ta su guest, bo ta wordo bon sirbi y cu un sonrisa alegre. Den torneo di Copa Richmond cu prome nan aya tabata invita team nan di LIFIDA y cual DAKOTA tabata participa campando henter dia riba nan veld, Jeanine tabata atento pa su bishita.
Mescos cu hopi otro clubnan aki na Aruba Jeanine, Irene, Veron, Naldo, Kencho cu a traha masha di cerca cu ne tabata “grawata cartera” pa treat tur su muchanan, durante wega y training. Cual nan a haci cu amor, pasobra den cada cara di e mucha > ta un yiu nan ta mira. Hopi tabata esunan cu lo por a haya otro impresión di su persona, pero na momento cu bo será conoci cu ne y trate, bo ta haya un Jeanine di curazon humilde, suave y sincero.
E no tabata perde niun wega di futbol ni di LIFIDA ni di hoofdklas tampoco team di damas di RCA. E tabata all-out cu RCA. Tabata biba tur emoción cu su club. Semper trahando cu novedades pa su team. Si, esey tabata e “idea” cu e ta tin di mas> su “CREATIVIDAD- bin cu cos nan NOBO”.
E a bin cu e lema di 100% RCA. RCA PA BIDA. Esnan cu conoce sa esey tambe y nos por a mira ora cu RCA tabata den play-off di Aruba tambe. E ta’ ta e anker den RCA, cu su ambiente, creatividad pa apoyo di su Club y no esey so.
Jeanine den temporada di Carnaval tabata design e costum, traha speech- hinca un bon show den otro cu su coreografia pa grupo Champagne y tur otro Reina cu pone nan confianza den dje. Ora cu Jeanine ta bin wak RCA hunga, hopi hende tabata yame e señora di RCA cu ta grita “shu- shu”.
Si asina mes Jeanine for di tribuna cu su man nan tabata grita y “shu” pa e bala no drenta goal di RCA. Ta mescos cu mi, cu ta reza y pone “doekla” cu mi dedenan pa e bala no drenta goal di Dakota. Jeanine bo presencia ariba veld y stadion, hunto cu hopi otro nan cu a bay nos dilanti caba y cu a stima-traha na bienestar di nan Club, lo keda semper graba den nos memoria.
Boso tey pa nos keto bay. Directiva di S.V. Dakota, y Comision di Dakota Lifida y Dakota Girls ta uni su mes den dolor cu partida di Jeanine y ta manda palabra di forza pa su tesoro nan Queeny, Jean Luc, Lujean , su mama, ruman nan, compañero di bida Adi, Lucki nos amigo di barrio y famia di Racing Club Aruba.
Jeanine, bo yiunan tin bo gracia, bo sonrisa, bo creatividad y bondad. Cu Papa Dios duna bo e “Dón” pa bo sigui compaña bo tesoronan for di Ariba. Pa bo proteha y guia nan “pa bida”. Cu Jeanine sosega na Paz di Señor. Amen. “
Pedro ‘Shonpe’ Krozendijk(miembro di RCA y familiar di Jeanine)
“Mi a conoce Jeanine como mucha mas o menos 42 aña pasa. E tempo ey un mucha di 4 aña cu ya tabata sa kico e tabata kier. Hopi spierto y inteligente. Travieso pero semper ora hala su atencion, e tabata tin comprencion cu ta pa su mesun bon ta dune conseho.
Tanto su madrina Glenda cu semper el a yama Dina y ami Shon Pe te ainda ta bao di un shock cu e morto repentino aki. E unico cos cu a resta nos ta reza na Dios Tata Todopoderoso pa consola nos y otro miembronan di famia cu e perdida irreparable aki.
Mi tabata tin e honor di a traha den bestuur di su club stima R.C.A. pa mas o menos 5 aña. Durante e añanan ey locual mi ta corda ta cu Jeanine ta un persona hopi dedica na e tarea cu e la wordu encarga cu ne. Su relatonan financiero tabata na tempo y exacto.
Den e luz aki mi por bisa cu e la sigi pasonan di su tata, Fenchi “Pai” Jansen (q.e.p.d.) cu a traha den bestuur di R.C.A. mas cu 25 aña largo. Tanto tata como yiu a laga honestidad prevalece bao tur circumstancia. R.C.A. tabata su bida caminda por bisa te hasta e la sacrifica su famia pa R.C.A. Jeanine, nos lo keda tene bo den oracion p’asina Nos Creador tuma bo den Su Reino. Sosega na paz. “
Edgar ‘Eddie’ Berg(Presidente di SV Britannia)
“Nos a conose Jeanine como un persona cu tabata dedica masha hopi tempo na su equipo R.C.A. tanto den division di R.C.A. Lifida y divicion di honor hunto cu su compañero Adi Thijsen. Den transcurso di añanan na algun ocasion nos tabata tin nos diferencianan di opinion pero semper Jeanine a keda cu respet pa e ser humano. Aruba y R.C.A. a perde un gran persona y nos di SV Britannia ta desea su juinan, Adi, su mama y tur su sernan queri forsa den e dianan dificil nos dilanti. “
Jose ‘Buchi Panama’ Wever(Presidente di LIFIDA Aruba)
“Mi a conoce Jeanine masha aña, un persona cu semper a traha na bienestar di e futbol Lifida, specialmente di RCA. Un bon persona pero sigur no facil, Jeanine tur ora ta sali na bienestar di su club y su muchanan, su opinion, su defensa a sali na cla despues.
E organisacion di Lifida y sigur Buchi lo sinti su falta, un di e personanan cu a contribui y yuda grandemente cu awe Lifida a crece y bira e organisacion cu ta representa futbol infantil na Aruba. Tur reunion general y otro reunionnan e tabata presente representando asina e futbol infantil. Buchi y tur su muchanan di Lifida lo haya su falta. Cu Jeanine sosega na Paz!!!”
