Seleccionnan di Aruba ta cla pa e weganan Latino Americano di Baseball
“Pueblo di Aruba: …Yega, Apertura ta AWE…”
ORANJESTAD(AAN)—Aruba ta orguyoso di por tin dos seleccion campeon ta participa den e Campeonato Latino Americano di Baseball categoria Senior cu ta inicia awe diasabra 17 di juli 2010 riba nos isla. E ceremonia oficial cu desfile di e paisnan cu ta participa ta cuminsa exactamente pa 6’or di atardi riba e veld completamente nobo di Winston na Macuarima, Sta. Cruz.
Seleccion Aruba I – South League:
Aruba I ta consisti di hungadornan di seleccion di South League cu ta campeon di Aruba 2010 y tambe e campeonan latino Americano di aña pasa. E seleccion di Aruba I ta fuerte y decidido pa duna tur loke nan tin pa mantene e titulo di campeon, mas ainda cu e campeonato 2010 Latino Americano ta tuma lugar riba nos isla.
E seleccion ta conta automaticamente cu e apoyo grandi di e fanaticada di baseball arubiano. E seleccion ta forma pa e hungadornan: Dwayne Luidens, Wilmer Imperator, Aldair Croes, Albertico Noguera, Shawn Duinkerk, Mitchell Martes, Miklos Petronia, Richenell Matos, Jose Luis Gonzalez, Milton Croes Jr., Marc Danies, Abraham Taveras, Chadwick Tromp, Jiandido Tromp, Raypatrick Didder, Marvin Brown, Juan Carlos Moncion y Jermain, Manuel. E Manager ta Greg Manuel y su Coachnan ta Milton Croes y Rayborne Didder.
Seleccion Aruba II – Center League:
Aruba II ta consisti di hungadornan di seleccion di Center League, cu ta sub-campeon di Aruba 2010. Como pais anfitrion, Aruba tin e derecho pa dos seleccion participa na e campeonato y esaki mas cu claro ta duna e fanaticonan di baseball mas motibo pa yega tereno di wega y duna apoyo na tur dos seleccion di Aruba.
E seleccion di Aruba II ta forma pa e hungadornan: Angelo Dos Santos Gamara, Carlvin Romario Maduro, Frankely Jesuz Ter Beek, Marvin Ashley Hart, Amadeo Alfonso Nicolaas, Filbert Felix Albert Thiel, Garrick Ludwig Croes, Bernard Gerard Geerman, Stanrick Joshua Ricao, Ixomar Schuilenburg, Bryan Roderick Thiel, Richnald Bikker, Djurwin Croes, Myron Eugene Koolman, Edgar Joel Flanegin y Carlos Miguel Maduro. Manager di e seleccion ta Karel Williams, hunto cu Coachnan Randy Rasmijn y Felix Thiel y delegadonan Rosa Winklaar y Marla Rodriquez.
Despues di preparacionnan intensivo di ambos seleccion tur cos ta cla pa e weganan. Seleccion di Aruba I ta e prome ekipo cu ta hunga den e di XXXVI Campeonato Latino Americano y ta estrena e veld nobo di Winston net despues di e ceremonia di apertura. E pais cu Aruba I ta enfrenta ta keda dicidi den e ‘Congresillo’ cu ta tuma lugar awe mainta.
Yega Aruba, yega veld di Winston awe tardi pa nos duna respaldo y apoyo na nos muchanan di seleccion di Aruba I. Entrada ta solamente Afls. 5,- pa hende grandi mientras cu mucha ta paga Afls. 2,-. No lubida riba nos stickernan cu ta bay pa solamente Afls. 3,-.
Cu e apoyo di Aruba completo nos muchanan lo sa di sobresali riba tereno y logra retene e titulo di Campeon Latino Americano pa nos dushi isla di Aruba.
