Seleccionnan di ARUBA ta yena pueblo cu orguyo
Y ambiente di Baseball den Latino Americano
ORANJESTAD (AAN):Weganan di e seleccionnan di Aruba ta tuma lugar tur dia riba Crismo Angela – Nadi Croes Ballpark. E dos ultimo wega di dia ta di e seleccion di Aruba contra otro di e paisnan participando den e XXXVI Campeonato Latino Americano, dunando asina e oportunidad na un y tur pa yega na e Parke di Baseball pa disfruta di e tremendo weganan, e dushi ambiente pero tambe pa apoya nos hoben peloteronan den nan gran hazaña.
Aruba 2 vs Corsou:
E ekipo di Aruba 2 (Center League) a enfrenta e fuerte ekipo di Corsou den un tremendo wega cu a cuminsa cu hit y careda for di den e prome inning di parti di Aruba 2, pero e hobennan di Corsou ta reacciona mesora den bom di e prome inning pa empata e wega na 2 careda. E wega ta sigui yen di emocion y finalmente ta Corsou ta logra domina y ta gana e partido cu e score di 5 pa 3.
Pa Aruba 2 e wega ta caba cu 3 careda, 2 hit y 2 error mientras cu pa Corsou tabata 5 careda, 5 hit y 3 error. E pitcher ganador a resulta Wendel Floranus y e pitcher perdedor a bira Ancelo Camara. E mihor bateadornan pa Aruba 2 tabata: Ixomar Schuilenburg cu a bay di 4-1 y Stanrick Ricao cu a bay di 2-1. Pa e ekipo di Corsou e mihor bateador a bira Gianfranco Wawoe cu a bay di 2-1 y Jonathan Eduarda cu a bati di 3-2.
Aruba 1 vs Guatemala:
E siguiente encuentro di anochi tabata di Aruba 1 cu a enfrenta e ekipo di Guatemala. Crismo Angela – Nadi Croes Ballpark tabata rand rand pa e wega aki cu a cuminsa yen di tension y emocion. Den prome inning caba e hobennan di Aruba 1 ta logra anota un careda pero Guatemala ta reacciona fuerte y ta empata den bom di inning uno.
Asina e wega ta desaroya y ambos ekipo ta faha duro. Pero e ekipo di Aruba 1 ta logra yena base y mediante base por bola caredanan ta drenta y Aruba 1 ta bay ariba. E wega ta finalisa cu Aruba 1 ganando cu 3 careda, 5 hit pero ta comete 3 error y di parti Guatemala, nan ta keda cu 1 careda, no ta conecta di hit y ta comete 1 error. Pitcher ganador ta bira Shawn Duinkerk y e pitcher perdedor ta keda Dennis Hurtarte. E mihor bateadornan pa Aruba 1 a resulta Chadwick Tromp cu a bati di 2-2 y Dwayne Luidens cu a bati di 1-1.
Seleccion di Aruba 2 ta hunga diaranson 21 di juli pa 5:00 p.m. contra di St. Maarten, mientras cu e seleccion di Aruba 1 ta hunga pa 7:30 p.m. contra di e ekipo di Venezuela. Ambos wega ta tuma lugar den Crismo Angela – Nadi Croes Ballpark y pueblo di Aruba ta keda cordialmente invita pa bin apoya nos peloteronan.
