Semper mester duna trahadornan local prioridad riba trahadornan di afo
Segun Minister Mike de Meza,
ORANJESTAD(AAN): Dialuna Gobierno a tene su conferencia di prensa y durante e conferencia di prensa Minister Mike de Meza a hiba palabra. El a splica cu semper e opcion di uza trahadornan local, ta e mihor opcion pa cualkier compania. E proceso di busca trahadornan for di exterior ta uno cu por ta mas caro y e proceduranan ta mas complica. Semper mester duna e trahadornan local e prioridad riba trahadornan di afo. Riba preguntanan di prensa tocante di Valero, e Minister a bisa cu loke e ta compronde di Valero ta cu nan ta traha solamente cu companianan cu ta inscribi na Aruba.
E mandatario a bisa cu te ainda pues ningun compania di afo a wordo contrata pa Valero, pa bin hasi trabaonan na Aruba. Bo no ta haya e permiso sin mas, pa bin cu compania of trahadornan di afo cu no ta inscribi na Aruba.
De Meza a bisa si cu ta bon pa hasi e preguntanan na Valero tambe, pasobra Gobierno no ta responsabel pa e operacion di e refineria. Gobierno a cera un acuerdo cu Valero cu mester bira un “win win situation” pa Valero, Aruba y Aruba su economia.
“Na prome lugar nos mester satisface e mercado laboral Arubiano y e economia Arubiano”, segun e Minister. De Meza a bisa cu durante ultimo tres simannan cu a pasa tabata tin tur sorto di speculacion unda cu tabata wordo bisa cu tur sorto di compania di afo a bin Aruba y cu tin trahadornan di pafo cu a bin Aruba.
Sinembargo na departamento di labor no tabata tin ningun peticion hasi pa esakinan.
Na DIMAS no tabata tin ningun peticion tampoco. E Minister a bisa cu ademas di esaki, ora a busca contacto cu Valero, a resulta cu ni Valero ni contratistanan cu ta traha pa Valero a hasi peticion pa trahadornan di afo.
Tilio Reátegui
“Semper mester duna trahadornan local prioridad riba trahadornan di afo”, bla… bla… bla. Prioridad… den kiko?
E frase ey ta relativo y ta trece confusion cu ta wordo aprovecha pa cierto polito inepto.
“Tur hende cu ta biba na Aruba tin cu wordo trata igual den casonan igual…” ta bisa e Articulo 1 di e GRONDWET VAN LAND ARUBA y mescos ta bisa pa tur hende cu ta biba na Hulanda e GRONDWET VOOR HET KONINKRIJK DER NEDERLANDEN .
Si algun nativo ta number dos den rij bo tin cu tuma esun cu ta prome (hende di afo cu ta biba na Aruba) toch?
Na Engeland y enter Europa (Paisnan miembro di Union Europeo) e gobierno y e compañianan local no ta usa e frase “prioridad na hendenan local riba e trahadornan di afo”. Cantidad di Polaconan na Engeland ta traha miho cu e Engelsnan.
Stop di fomenta chaubinismo populista y barata pa purba busca sosten di algun individuo ya cu e actitud aki bo ta fomenta xenofobia.