Gasto di miyon Florin di helicopter por worde mihor usa pa polisnan
Lider di PDR: Mientras helicopter ta costando Aruba 1 miyon florin anual:
ORANJESTAD (AAN) — Lider di fraccion di PDR, den conferencia semanal cu a tuma lugar diamars, a elabora riba e falta di material pa Cuerpo Policial, di cual polisnan mes tin keho.
“ Mi a tuma nota cu e sindicato di polis ta declara y participa cu nan ta haya falta di material”, mr. Bikker a señala. Varios siman pasa el a haci pregunta precisamente na Minister di Husticia, cuanto e helicopter ta costa nos pueblo.
“ Siman pasa mi a haya contesta riba esaki y a bin resulta cu e helicopter ta costa pais Aruba como un miyon florin pa aña.
“ E ora ey poniendo den balansa y mirando cu polis ta bisa cu nan no tin uniform, Inspectornan di Polis no tin nan bachi protocolario, no tin chaleco contra bala, tin falta di material, nos pueblo ta exclamando pasobra nan no tin e proteccion adecua, si bo ta puntra bo mes kico ta e balor agrega di e helicopter, y si no ta mehor pa nos candela e contrato aki y pa nos duna nos polisnan e material cu nan mester.
“ Y si mester tin un helicopter mes, pa 200 mil dollar bo por haya uno cumpra. Aworaki nos ta pagando casi un miyon florin pa aña caminda cu e no ta di pais Aruba y cu e ta un helicopter hopi obsoleto”.
Peticion di mr. Bikker pa Minister di Husticia ta pa puntra su mes, como mandatario, kico ta e balor di e helicopter y kico nos Cuerpo Policial falta pa duna e servicio apropia cu pueblo ta spera di dje.
