Tin hende cu kier crea e impresion cu Brandweer ta completamente na werki
Segun Minister Dowers,
ORANJESTAD(AAN): Diaranzon DIARIO a entrevista Minister Arthur Dowers, tocante e situacion cu ta reina na Brandweer. Segun e mandatario el a ricibi dos carta, di cual uno ta un carta cu e sindicato SINBA a manda pa comandante di Brandweer y e otro ta un carta cu nan a manda pa e Minister mes. “Mi intencion ta en todo caso pa combersa cu SINBA dentro di algun dia, pero como Minister responsabel pa seguridad pa loke ta trata Brandweer, lo mi hayami toch den e oranan cu ta sigui, ta papia cu e personal di Brandweer”.
Esaki segun Dowers, kende a sigui bisa cu e ta realiza cu e informacion no ta yega corectamente na e personal. “Mi ta haya hopi lamentable cu cada biaha di nobo ta crea y ta duna informacionnan incorecto”. El a duna un ehempel di esaki.
Segun Minister Dowers, el a tende cu Brandweer a keda 6 aña sin haya uniform nobo.
“Awor mi ta puntra mi mes, ki sorto di uniform bo tin, pasobra hopi bon nan mester ta pa nan wanta 6 aña”.
“Dicon despues di 2 of 4 aña bo no ta bisa nada”, Dowers a sigui bisa. Awor ta warda 6 aña, pa despues cuminza cu un accion di morocoy, pasobra bo no a haya uniform. Mescos ta conta pa otro material.
E Minister a bisa cu na e momentonan aki ta order diferente material y tin diferente proceso interno andando den Brandweer. Na dado momento nan ta hasi nan peticionnan y esaki ta wordo paga door di Gobierno.
E Mandatario a sigui bisa cu ta imposibel cu den un organizacion manera Brandweer, nan no sa cu nan mester cumpra uniform pa e trahadornan y cu 6 aña a pasa sin cu nan a haya uniform.
Dentro di poco ta bay bin un investigacion den Brandweer, caminda cu lo laga un accountant hasi un analisis di tur e procesonan aki y ta bin tambe un experto pa hasi un analisis di e calidad di e material.
Esaki ta necesario, pasobra tin hopi informacion cu ta sali for di Brandweer cu no tur ora ta cuadra cu berdad. Segun e Minister, tin hende ta purba crea e impresion cu Brandweer lo ta completamente na werki, siendo cu otronan cu ta traha den Brandweer ta bisabo cu esey no ta e caso.
