Trahador a exigi su check despues di 3 dia di trabao
ORANJESTAD.(AAN):– Tabata den careda di 5’or diaranzon cu central di polis a ricibi yamada cu na un cas situa na Bubali lo tin un caso di amenasa. Patruya cu a presenta na e direccion a atende e señora di inicialnan J.A.T. di 40 aña di edad, cu ta encarga cu un oficina seguridad. E señora a splica polis cu un ex trahador di inicialnan E.G. di 52 aña, a drenta den oficina cu intencionnan menos bon. Ora cu ex trahador a blo den oficina e tabata arma cu un bat di “Softball” y a exigi na mal orden su check. E no kier a tende storia y a expresa palabranan vulgar.
Tambe e señora a splica polis cu apenas tres dia so e homber E.G. a traha pa e negoshi. Parce e trahador lo a yama puntra pa su check y e lo a wordo notifica cu e tin di tuma contacto cu doño di trabao.
Prome e homber a manda su señora y despues e mes a presenta arma cu bat softball.
E accion di E.G. tabata tin su consecuencia ya cu J.A.T. a sinti su mes menasa.
Ta bin acerca cu despues cu e E.G. a bandona e oficina, e no por a bay cu su auto debi cu un colega di seguridad a saca e yabi for di vehiculo.
Consecuentemente e ex trahador obligatoriamente a move bay na pia lagando su auto atras.
Mientras tanto polis a bisa señora J.A.T. pa percura pa e ex trahador haya su yabi auto bek. Y si J.A.T. a sinti su mes menasa e por pasa na despacho di recherche entrega keho oficial contra di e ex trahador.
