Travel Team di Aruba (Giants) a gana di St. Maria cu e score di 8-5
ORANJESTAD (AAN)— Recientemente na Ripoldo Croes Ballpark a tuma lugar e di dos wega entre Aruba y Curacao den Minor League, e intercambio deportivo aki cu durante vacantie a sali masha great mes pa e muchanan. E wega mes a cuminsa bon cu den e prome inning caba Aruba ta bai dilanti 1-0 ora cu Jean Claude Hernandis a conecta hit pa center y Lyonell Briesen a saca un bataso duro riba cabes di e short stop cu a bai te cura, asina hasi cu Jean Claude a score di primera pa home. Den di cuater inning Aruba a amplia e ventaha cu un careda mas por medio di Eric Mendez cu a sali cu un doblete y despues tabata Raibiently Mercalina cu ta conecta hit pa empuha Eric.
Curacao a corta ventaha di biaha den ining 4 atravez di Kaeber Rog cu a sali cu un doblete y despues tabata Shurventely Daal cu a dal hit pa Kaeber anota.Den inning 5 Curacao a saca un rally di 4 careda pa completa 5 careda.
Den inning 5 atrobe Eric Mendez a conecta doblete cu a produci careda 3 pa Aruba riba un core core y mal tiro pa tercera.Den e ultimo inning, na unda cu ya e bishitantenan di Curacao a cuminsa celebra nan victoria cosnan a bolter y Aruba a saca un rally di 5 careda cu a acumula un total di 8 careda, tabata Ardwin Tromp cu a risibi un base por bola, Ronald Werleman tambe a sigui cu base por bola, Obrian Barret a pone un toke di sacrificio perfect riba primera avansando Ardwin y Ronald pa tercera y segunda, Jean Claude Hernandis a los un rolling duro riba e tercera base cu Jurden D’arnault no por a traha cu, asina e basenan a yena completamente sin ningun out y Lyonell Briesen a conecta un hit pa left y asina e wega a empata 5-5.
E tercer bate di team cu tabata Jerrick Francees a manda Aruba un vez mas dilanti ora el a conecta un doblete te na cura y Eric Mendez a bolbe conecta hit pa empuha Jerrick cu a bira e careda 8. Den un inning Aruba a tuma ventaha comodo di tres careda y Curacao a sera e inning ora cu e closer di Aruba Brandon Rincones a saca su tres outnan facil como pitcher y sigura e wega.
Aruba a gana e di dos wega.Mihor Bateadornan pa Aruba tabata Eric Mendez 3-4, Jerrick Francees 2-4, Jean Claude Hernandis 2-4, Lyonell Briesen 2-4, Miguel Thiel 1-3, Brandon Rincones 1-4, Raibiently Mercalina 2-3, Mariano Decena 1-1. Pitcher habridor tabata O’brian Barret, relevo tabata Lyonell Briesen. Un tremendo wega caminda hopi hit a cai pa e equipo local di Aruba.
