Zaithyel Soekandar W5 rumbo pa Sur Africa
ORANJESTAD (AAN)— “Commission Campeonato mundial di BMX” tin e honor di presenta su atleta cu lo representa Aruba na e BMX World Championship 2010 na Sur Africa. Zaithyel Soekandar lo ta defendiendo nos bandera y su titulo di 5to puesto logra aña pasa na Australia. Lastimamente, Juanriq Martis y Zyqion Soekandar lo no por ta presente pa motibo financiero y un lesion na su schouder cu ela sufri durante entrenamento. Despues di un periodo di entrenamento severo bao guia di Jozef Everon, Zaithyel a logra cumpli cu tur su exigencianan y a sa di demostra cu logronan positivo durante su weganan di fogeo. Na Februari, Zaithyel a viaha pa Estados Unidos unda el a logra un prome y un segundo puesto den su categoria. Den luna di Mei, Zaithyel a competi na e weganan Panamericano di BMX na Ecuador na unda el a logra e segundo puesto despues di a cualifica number uno.
Siman pasa durante e International Youth Championships aki na Aruba, Zaithyel a sali como e Campeon absoluto den su categoria.
Zaithyel lo ta viahando dia 19 di July pa Hulanda, pa despues sigui cu su viaje pa Sur Africa.
Commission Campeonato mundial di BMX kier a felicita Zaithyel Soekandar pa su logranan te cu awor y kier a desea Zaithyel y ful e delegacion di Aruba, hopi exito na e campeonato mundial na Sur Africa, nos ta sigur cu boso lo sa di defende nos bandera dignamente den exterior.
Tambe e comision kier a felicita Zaithyel pa su bunita rapport cu cual ela bai over pa 2de klas na Colegio Arubano.
