‘Satanas’ a bisa di no tin curazon pa hasi hende daño
*e caso lo continua na December
ORANJESTAD(AAN): Diabierna na corte a trata un caso den cual Reynaldo S.J tambe conoci como “Satanas”, a wordo acusa di a intencionalmente tuma bida di un persona riba 3 di Mei 2010, door di hinke cu un cuchio den su curazon y/of dal e cu un bat di baseball na su cabez, a consecuencia di cual e persona a fayece. Tambe el a wordo acusa di hunto cu un otro of otronan y riba caminda publico, a comete violencia contra e persona en cuestion riba 3 di Mei 2010.
E violencia tabata encera cu el a dal y/of scop e persona mas biaha na su curpa y/of a dal e cu un bat di baseball y/of a hinke cu un cuchio. E violencia aki a hiba na morto di e persona.
J. ta wordo acusa di hunto cu un otro of otronan, a menaza un y/of dos persona cu un crimen contra nan bida y/of maltrato riba 22 di April 2010, door di bisa e personanan aki na un manera intencionalmente menazante: “Seh, baha bin awor.
Bo a … cu mi mama su auto. Awor bo ta bay muri. Bo bin den barrio, nos ta mata bo” of palabranan parecido y/of a saca un cuchio y a mustra nan y a zway cu e cuchio den nan direccion y/of a bisa nan cu e lo mata nan y of tira nan y/of a coy un boter y/of a menaza nan cu ne y/of a tire riba un auto.
Ademas di esaki el a wordo acusa di, cu e intencion di tuma bida di un persona riba 12 di September 2008, a intencionalmente scop e persona aki mas biaha na su cara y/of curpa.
Tambe e ta wordo acusa di a intencionalmente maltrata un otro persona riba 12 di September 2008, door di hinke cu un arma, esta, un cuchio, na su pia, door di cual e persona a resulta herida y/of a sufri dolor.
Alavez e ta wordo acusa di, cu e intencion di maltrata e persona aki cu un arma riba 12 di September 2008, a tira un boter den su direccion. Huez a cuminza repasa e caso di 2008, unda cu Satanas a wordo acusa di a scop un persona mas biaha na su cara y di a hinca un persona den su pia.
Huez a puntra e acusado kico a sosode e dia ey. El a splica cu e tabata bayendo cas for di trabao y tabata tin algun hende bringando cu otro. Na dado momento el a sinti un hende pushe di patras.
E no tabata sa ken e persona ta, pero el a pusha e persona aki y a scop e tambe cu su ‘safety shoes’.
Satanas a splica huez cu no tabata asina cu el a bay eynan pa e participa na e pelea
E acusado a bisa huez cu ora polis a bin nan a listra su curpa y nan no a haya ningun arma, pasobra e no tabata cana cu arma.
El a splica cu despues cu nan a lage bay, nan a bay na su cas y eynan nan a detene y trate manera un criminal. E victima sinembargo a bisa cu Satanas y un grupo di otro persona a core su tras cu bat di baseball y el a sinti un golpi tras di su cabez.
El a cay abao y a wak satanas cue bat di baseball y Satanas a scop e tambe. Huez a puntra e acusado si e ta forma parti di e gang di Sabana Basora y el a bisa cu no.
E otro victima a declara tambe cu ta Satanas a hinke cu cuchio, pero Satanas den corte a nenga.
Huez a puntre dicon tur hende ta declara contra dje, si e no a hasi nada.
El a splica cu e tin un grupo chikito di rap y nan ta pone cancionnan riba YouTube y eynan mucha hombernan di Pos Chikito ta pone comentarionan ofensivo contra su grupo.
Huez a bisa cu riba YouTube el a wak potret di gang cu arma etc, riba e grabacionnan di YouTube cu palabranan ofensivo.
Satanas a bisa cu personanan di St Cruz cu tambe sa rap quizas tin problema cu esnan di Pos Chikito y como cu St Cruz sa rap riba su cancionnan tambe, quizas Pos Chikito tin algo contra dje.
Pesey segun e acusado, ora nan a wak polis detene, esnan di Pos Chikito a sigui declara mas cos contra dje.
Pa loke ta e caso di menaza, Satanas a splica cu el a pensa cu e personanan ey a causa daño na auto si su mama. El a splica cu semper nan ta pasa den caya di cas di su mama y nan ta tira palabra.
Tin biaha nan ta tira piedra tambe riba dak di cas di su mama. El a rabia pasobra el a pensa cu nan a hasi algo cu e auto y el a bay na e cas cu cuchio den man. Huez a puntre kico e kier a logra cu esey y pakico el a bay cu cuchio den man.
El a splica cu e kier a spanta nan y pidi nan pa nan no pasa mas dilanti di cas di su mama.
Pa loke ta e cuchio, el a bisa cu for di dia cu un di e personanan ey a pone arma di candela na su cabez, el a keda cu miedo y e tabata sa cu semper nan tin arma riba nan.
Pues for di e tempo ey el a cuminza cana cu cuchio pa defende su mes contra nan. Polis a bise cu si e sa cu e personanan aki ta cana arma, e mester a bay polis y entrega un keho, en vez di purba regla cuenta su mes.
El a bisa cu polis nunca ta hasie caso, pasobra nan ta pensa cu e ta mal persona y semper nan ta trate manera un criminal. Huez a bisa cu si ta asina mes, e por a bisa su mama pa bay entrega un keho cerca polis pa loke ta e daño riba e auto y no bay na e cas cu cuchio den man.
Pa loke ta e palabranan di menaza, Satanas a bisa cu e no a bisa e personanan cu e lo mata nan, manera tin para den e acusacion. Na dado momento e acusado a bisa huez cu den casonan asina e semper ta pone cara mahos pa spanta e personanan, pero el a bisa cu e no tin curazon pa hasi hende daño.
Huez a bise cu si e cana cu cuchio skerpi den man manera el a hasi, chens ta grandi cu un hende por wordo lastima. Huez a puntra e acusado tocante su bishita cerca un psicologo despues cu aparentemente e lo a hasi un intento di kita su bida.
Satanas a bira emocional e ora ey y cu lagrima na wowo el a bisa huez cu e sa cu diferente biaha el a comete error, pero cu e ta purba semper di hasi su best pa drecha y hopi biaha e circunstancia y hendenan no ta dune e chens pa e cambia. Huez na dado momento a para tratamento di e caso.
Tin un acusacion mas cu mester wordo trata, esta esun unda cu Satanas lo a hinca un persona mata, pero huez a indica cu falta algun documento di e caso ey ainda y pesey el a pospone tratamento di e caso te cu dia 10 di December.
