1138 persona lo subi caya pa realiza Censo 2010
Personal di CBS debidamente identifica lo bishita bo cas entre 29 September te cu 6 October
ORANJESTAD (AAN): Monique Plaza-Maduro tambe ta un ehecutivo di CBS. Nan ta preparando e conteo di Censo. Falta menos cu un luna pa Censo 2010 tuma lugar. Censo 2010 lo cuminza dia 29 di September te cu dia 6 di October. Tin hopi cos cu mester pasa prome cu bay over na subi caya y cuminza conta e poblacion. Un training di personal ta hopi importante, y esaki nan ta hacie internamente, segun Señora Plaza- Maduro.
1138 hende lo forma parti di e conteo aki. Ta bay tin mester di 117 controlador tambe. Pa esaki a parti Aruba den 56 diferente distrito pa haci e conteo, a bisa. Den cada un di e 56 distrito aki lo tin un centro di conteo cu mayoria ta un school y pesey ta gradici cada cabezante di school cu a pone nan school disponible pa por haci uso di dje durante di e censo, a manifesta.
Tin diferente mapa tambe, a añadi, caminda cu CBS ta mustra con a parti Aruba pa asina por conta tur persona na Aruba.
Tin diferente formulario cu a ser traha. Ta trata di tres formulario di cual tur ta duna Censo diferente informacion. Un di e formularionan tin di haber cu e caracteristicanan personal. E otro ta caracteristicanan di e vivienda y e otro ta mas tanto e composicion di e hogar cu ta ser encuesta, a señala.
Segun Monique Plaza-Maduro cada teller cu subi caya mester ta identificable. Nan ta haya un polo shirt y tambe nan por worde identifica via un badge di CBS. Tur badge tin e logo di e censo riba dje, pero tambe e logo di CBS patras.
No ta ken cu ta, ta yega bo cas pa haci un encuesta. A percura pa tur e encuestadornan tin un contract cu CBS bao di mandato di minister y nan mester mantene nan mes na e reglanan pa warda e privacidad di cada ciudadano di Aruba, a splica.
CBS ta sigura e anonimidad di cada persona cu ta coopera cu e censo. Tur dato cu CBS ta saca ta datonan agrega y no ta bisa cu un persona ta gana tanto placa. Por ehemplo ta ser indica cu 10% di e poblacion ta cay bao tanto di e entrada general. Por bisa tambe tanto persona ta traha den hotel, educacion, pero no ta “highlight” ningun hende specifico. Esey no ta e trabao di CBS, a enfatiza.
