18 pais confirma caba pa campeonato Bodybuilding di Caribe
ORANJESTAD (AAN)- Recientemente tabata tin un conferencia di prensa den Stadion Guillermo Trinidad di Aruba Bodybuilding & Powerlifting Association pa nan elabora ariba e ultimo desaroyonan den bodybuilding. Na e occasion aki Giovanni Arendsz, presidente di Aruba Bodybuilding & Powerlifting Association a bisa cu e aña aki tin hopi interes atrobe pa e campeonato di Mr. Aruba y tambe pa e campeonato di Caribe. Ya caba tin 18 pais ta confirma y varios pais ta bin cu mas di 20 participante. E campeonatonan mes ta tuma lugar dia 24 y 25 di September y lo tuma lugar na Westing Hotel.
Aruba Bodybuilding & Powerlifting Association tambe a lanta un comision pa monitor e bodybuildernan y pa escoge esnan cu ta representa Aruba.
E comision ta consisti di Rodney Pieternella, Igmar Franken, Edguar Maduro y Wendy Lacle.
Sr. Arendsz a bisa tambe cu tin tres atleta cu a biaha pa Puerto Rico pa e campeonato ayanan kendenan ta Guivert Schouten, Papie Wiersma y Nizana Solognier hunto cu nan coach Rodney Pieternella.
E mes a biaha ayera y e campeonato lo tuma lugar awe na Puerto Rico. Mas den e dianan aki lo bay tende mas di e evento di Mr. Aruba y e campeonato di Caribe pa haya sa cuanto participante lo bay tin y cual lo ta e paisnan participando.
