4 luna condicional, pa posesion di arma di candela pa proteha 132 cabrito
ORANJESTAD(AAN): Diahuebs Lorenzo v. R., Daniel A.W y Martin B.W a presenta dilanti di huez, pa un caso penal contra nan. L.R a wordo acusa di posesion di 341 mata di marihuana entre 18 di Mei y 20 di Juni 2007, como tambe posesion di marihuana. D.W y M.W a wordo acusa di posesion di arma di candela y patronchi y posesion di marihuana riba 20 di Juni 2007. Ademas di esaki M.W a wordo acusa di posesion di 234 mata di marihuana. Huez a cuminza repasa parti di e rapport di e caso contra L.v.R.
El a indica cu den e rapport tin para cu L. a wordo examina pa y psiquiatra y el a constata cu for di su hubentud, L. tabata tin problema cu dyslexia y ADHD. E rapport a mustra tambe cu abogado di e acusado a mustra cu estudionan ta bisa cu marihuana tin un efecto positivo riba hende cu tin ADHD y esey ta un di e motibonan pa cual L. tabata huma hopi marihuana.
L. semper a bisa cu e marihuana cu e tabata cultiva no tabata pa bende, sino pa uso propio.
Pa loke ta e caso contra D. y M. cu ta tata y yiu, den e cas a wordo haya un tipo di shotgun y e tabata D. a splica cu mirando cu e tin 132 cabrito, e ta uza e arma aki pa defende su bestianan, contra entre otro cachonan.
El a bisa cu el a pidi permiso pa e arma, pero cu e no a haya esaki. El a bisa tambe cu el a tende cu tin un tipo di ley na Aruba cu ta bisa cu si bo tin mas di 50 cabrito, bo mag di tin un arma di candela pa proteha nan.
Pa loke ta e droga, M. a bisa huez cu e tabata pa uso propio. Huez a puntre si ainda e ta planta mata di marihuana y el a bisa cu no. El a splica si cu de bez en cuando e ta huma ainda. D. a splica huez cu marihuana ta calmabo, pero huez a bise cu awendia tin marihuana mas fuerte, cu lo por tin otro efectonan tambe riba un persona.
Huez a puntre unda el a haya e arma y el a bisa cu el a hereda esaki for di su tata, kende tambe tabata cria bestia. Segun huez, e arma no a wordo haya scondi den e cas, como si fuera e tabata wordo warda pa comete crimen cune.
Fiscal a haya tur tres culpable di e hechonan. El a bisa cu den e cantidad di castigo cu e ta pidi, e mester tene cuenta cu e hecho cu e caso ta di 2007. Pa loke ta L.v.R, fiscal a bisa cu L. no a wordo acusa di ta bende droga, aunque tin indicacion cu esaki lo por tabata posibel. El a bisa cu el a tende cuenta cu e posibilidad aki den e castigo cu el a pidi.
Fiscal a exigi un castigo condicional di 6 siman contra L. Pa loke ta D.W, fiscal a indica cu normalmente e maneho di O.M ta cu si bo wordo haya cu arma di candela, bo ta cuminza na haya 12 luna.
Sinembargo den e caso aki e arma a wordo haya na cas y fiscal a kere D. ora cu el a bisa cu e ta uza e arma solamente pa proteha su cabritonan. El a exigi un castigo condicional di 4 luna. Contra M.W fiscal a exigi 2 luna condicional.
Abogado Arlene Schipper kende a defende L. a critica e hecho cu O.M a tarda 3 aña pa trata e caso aki. El a splica cu su cliente nunca mas a haya su mes den problema cu husticia y awor cu el a bira tata y su bida ta bayendo den bon direccion, a bin cu e caso aki despues di 3 aña. E abogado a bisa tambe cu e rapport di e caso ta hopi bruha.
El a pidi huez pa declara O.M no admisible mirando e tardanza pa trata e caso aki y pa su cliente no haya mas castigo cu locual el a sinta caba, cu ta 35 dia den detencion preventivo.
Tambe el a pidi pa L. haya e placa cu a wordo confisca di dje bek, mirando cu no tin acusacion contra dje di bendemento di droga.
Abogado Figaroa representando D. y M., a bisa huez cu e ta di acuerdo cu ponencia di abogado Schipper pa loke ta tardanza di e caso.
E abogado a pidi huez tambe pa su clientenan haya e auto bek cu autoridadnan a confisca.
Na final huez a duna L. un castigo igual na e tempo cu el a sinta caba, esta 35 dia. Pa loke ta D., huez a duna 4 luna condicional y M. a haya 2 luna condicional. Ambos cu un tempo di prueba di 2 aña.
Huez a dicta tambe cu L. tin cu haya e placa cu a wordo confisca, mientras cu D. y M. tin cu haya nan auto bek.
