Analisis politico…. MEP y su mes
ORANJESTAD (AAN): Nos lo keda purba di mustra ariba e peligernan di un MEP den gobierno atrobe. Hopi hende ta sinti un tranquilidad awo cu MEP ta den oposicion y masha poco ta pensa ariba e posibilidad di MEP den gobierno un biaha mas. Nos a experencia esaki caba den pasado cu hende a lubida completamente kico MEP den gobierno kier meen pa e desaroyo di nos isla. Pesey e ta nos responsabilidad pa keda mustra continuamente cu mientras e mentalidad di e dirigentenan di MEP no cambia drasticamente nos mester evita di tur manera pa nos pasa den un miseria asina pa cuatro aña mas den futuro. Un pais democratico ta worde goberna door di partidonan politico cu ta haci esfuerzo pa yega na gobernacion a base di un programa, un plan di accion pa futuro. Tin partidonan di diferente ideologia cu ta nan base di existencia y segun cual nan pensamentonan ta worde forma.
Tin un variacion di ideologianan den mundo cu den paisnan democratico ta e plataforma di e partidonan segun cual nan ta desea pa nan pais desaroya su mes. Ora un pais ta bon organiza e partidonan politico tin opinionnan fiho cu ta destingui nan for di otro y a base di cual un mayoria ta worde busca pa goberna e pais segun e programanan cu a worde presenta.
Na Aruba nos tin de facto dos partido grandi existente e ultimo cuarenta aña. MEP a lanta na 1970 for di AVP y AVP a lanta for di pueblo na añanan 30 di siglo pasa. Fuera di PPA y UNA cu un temporada tabata partidonan grandi tur otro partido na Aruba tabata partidonan chikito cu no a existi mucho tempo. MEP a lanta despues cu tabatin un lucha interno den AVP kende mester a bira lider di AVP.
Despues di poco tempo MEP a escohe pa e ideologia Social Democrata probablemente pasobra AVP tabata un partido Social Cristian pa hopi aña caba. E origen aki di MEP a pone cu nunca e partido aki a concentra seriamente ariba nan propio ideologia y formula nan puntonan di bista basa ariba esaki. E partido aki su existencia tabata basa ariba e lucha estatal cu a cuminza cu Status Aparte y a bira na caminda un lucha pa independencia.
Pesey e lider di MEP e tempo ey a concentra ariba structrura estatal y no a yega na e punto cu mester a duna e partido un contenido mas amplio pa su futuro existencia. Ora cu Nel Oduber a tuma over liderazgo di MEP e partido a bira un organizacion di un grupo di hende cu solamente tabata den politica pa nan propio interes y nunca a concentra ariba programanan na beneficio di e pueblo en general basa ariba cierto idealnan, principionan of ideologia.
Nan a crea un cultura tambe cerca nan hendenan cu nan mester ta votador di MEP pasobra votando pa MEP e votador ta cualifica pa haya beneficionan directo di e partido ora e ta den gobierno. Asina MEP a funciona te awe y ta mustra cu nada no ta bay cambia tampoco. E ultimo eleccion MEP no tabatin nada di programa y e eleccion prome cu e ultimo MEP tabatin 10 punto di salida pa e proximo periodo di gobernacion.
Ningun di e 10 puntonan nan a realiza. E manera corupto cu MEP a goberna e ultimo 8 aña a bira un ehempel spantoso pa henter nos comunidad con desgracia un pais por ta bao di un gobernacion asina.
Ta pesey nos ta sinti cu awo cu pueblo a mira kico MEP a haci durante e 8 añanan cu a pasa nos mester percura pa of e partido aki cambia fundamentalmente of e mester desaparece pa evita cu mayan nos pueblo ta haya su mes ta sufri atrobe bao di hendenan sin principio, sin ideal y cu ta basa nan gobernacion ariba nepotismo cu pa nan a bira algo normal.
Un rato e speranza a lanta ora un par di candidato nobo a aparece ariba e lista di MEP pero den corto tempo cada un a mustra cu nan ta pio cu e bieunan cu a keda. Nan a mustra den corto tempo cu nan ta den MEP pasobra nan tin e mesun mentalidad y cu nan ta aproba loke MEP a haci y ta haciendo.
E lo tuma kizas si MEP tin tempo di biba un generacion mas cu lo por cambia e mentalidad putri di e dirigentenan di awe. Tur e capriolanan di nan den dianan aki ta un comedia pa sconde nan berdadero mentalidad. Den pura nan ta trata di loanta un imagen nobo bao di e titulo “un rumbo nobo”.
