Aparentemente, Ministerio Publico a actua di forma no admisible pa nos estado di derecho
Lider di PDR ta hopi preocupa cu caso den Corte:
Incluso ta ser papia di 40 mil dollar falso paga na infiltrante:
ORANJESTAD (AAN) — Den conferencia di prensa di fraccion PDR, su lider politico mr. Andin Bikker, a declara cu pa Aruba su Estado di Derecho ta sumamente delicado, un caso cu ta wordo trata den Corte na e momentonan aki. Ta trata di e “Opsporen Bijzonder Method” (metodo special di rastreo) unda a haci uso di infiltrantenan na 2006 bin ariba, pa infiltra cierto organizacion di crimen organiza y cu hasta lo a haci uso di 40 mil dollar falso.
“ E asunto aki ta sumamente serio, si e ta berdad, y merece di investigacion. En todo caso, no por ta asina cu den un Estado di Derecho, unda Ministerio Publico su tarea ta pa aplica ley na esnan cu ta comete actonan castigable, pero aparentemente e ta asisti personanan cu ta infiltra den organizacionnan criminal, y haci uso, aparentemente, tambe di dollarnan falso pa asina aki obtene evidencianan pa persigui esakinan.
“ Segun mi, Ministerio Publico no ta para riba ley. Na Hulanda, por corda, tabata tin e “IRT Affair” y esey a pone cu por lo menos dos minister mester a tuma nan retiro y a bin repercusionnan hopi grandi, pa loke ta trata e tipo di metodonan aki.
“ Hecho ta cu, na Aruba, nos no tin un reglamentacion legal pa loke nan ta yama BOP. E concepto di ley segun mi a wordo informa, lo ta pendiente na Staten, mi ta bay pidi pa e bin mas pronto posible den agenda, pa en todo caso, nos tin un reglamentacion y cu no ta opera den e schema pa loke ta trata e tipo di maneranan aki pa purba haci investigacionnan pa hechonan castigable.
“ Mi ta hopi preocupa, mirando nos Estado di Derecho pa e aparente declaracionnan di un sospechoso, supuestamente infiltrante, cu a haya 40 mil dollar door di Ministerio Publico, y cu a resulta cu e 40 mil dollar aki ta falso, pa haci cierto transaccionnan.
Esaki mi ta kere, den un Estado di Derecho, nos mester para keto un rato y wak ta te unda nos por bay den e tipo di infiltracionnan aki, y vooral nan mester haya un base legal mas pronto posible.
“ Mi a tuma nota cu Ministerio Publico a bisa cu ya caba nan tin un tipo di reglanan cu nan a publica, pero bo no por tin un reglanan si bo no tin un base legal pe.
Pasobra ta Parlamento y Gobierno ta legislador, y no por laga un departamento bay traha regla riba su mes, y bin cu un of otro directiva, of un decreto ‘aparentemente’, dus e ta bay e ora ey di un Estado di Derecho bira un co-legislador.
Esey merece atencion di Parlamento, den mi concepto”, mr. Andin Bikker, lider di fraccion PDR a acentua.
