Arma y municion haya den maleta di pasahero pa St. Maarten
ORANJESTAD.(AAN): — Algun siman pasa cuerpo di polis di Sint Maarten, encabeza pa Peter de Witte tabata man na cabez. Mas ainda e fiscal mayor mihor conoci pa “Hij is niet zomaar iemand” a sclama pa yudanza. E grito y sclamamento tabatin di haber cu crimen a aumenta y tin cantidad di caso ainda cu no por wordo soluciona. A dicidi pa solicita cu urgencia coleganan di otro islanan, entre otro Aruba y Corsow pa duna un man relaciona cu e falta di personal policial cu experiencia na St. Maarten. Varios recherche local a toca Aruba pa bay Sint Maarten pa duna nan coleganan un man. Segun informe tin casonan cu dentro di poco ta bay wordo soluciona.
E tarea no ta facil pero hopi ciudadano no ta coopera, debi cu nan lo tin miedo pa represaya, pero poco poco e confianza entre comunidad y cuerpo policial ta riba bon caminda.
Mientras tanto a surgi un otro desaroyo ora cu na Schiphol autoridad a baha un sospechoso di abordo di un avion. Segun informe e pasahero tabata biahando pa Sint Maarten cu su cos di tira.
Informe ta menciona cu Marechaussee diabierna mainta a detene un homber cu tabata tin bon scondi un arma di candela automatico den su maleta.
Ta conoci cu control ta wordo hiba na mayoria di vliegveld internacionalmente. E homber kier a hiba e arma Isla Ariba (Sint Maarten) cu ta wordo azota pa crimen. No ta conoci e motibo exacto cu e homber a empaketa e arma automatico di tal forma pa evita cu esaki lo wordo descubri y yega su destino.
Mientras e pasahero tabata sinta den avion, su maleta tabata wordo debidamente controla y a bin descubri pa medio di mashine special di scan e arma y e municion cu tabata scondi den un asina yama blok di parafina basha, lora den plastic y hasta deken pa empaketa esaki.
Ora personal encarga pa controla tur carga cu ta bay abordo di avion a descubri e arma riba e scan nan a notifica mesora efectivonan di marechaussee. A base di e label a saca afor kende ta doño di e maleta, mesora via computer a saca afor cu e pasahero ta abordo di e avion cu ta cla pa lanta vuelo.
Marechaussee a subi e avion y detene e pasahero mesora y a hibe na oficina mientras a start cu interogacion. Mas dato no a wordo suministra si a sigui detene e pasahero di 34 aña. No a duna su identidad tampoco y si e lo a perde su vuelo pa Sint Maarten.
