Aruba Way Foundation un biaha mas ta uni comunidad cu nan caminata pa bon causa
5 aniversario di Caminata di Aruba Way
ORANJESTAD (AAN) – Aruba Way Foundation ta conoci pa ta un aporte fundamental pa instancianan caritativo den nos comunidad. Tur aña Aruba Way ta organisa su caminta unda ta recauda fondo pa un bon causa. ‘E aña aki Aruba Way Foundation ta celebrando nan di 5 aniversario di e Caminata, cual ta bira motibo suficiente pa haci e Caminata mas grandi cu nunca’, tabata palabranan di Sra. Judella Jeandor, miembro di comision organisatorio di Aruba Way Fun walk/run 2010.
Durante di un conferencia di prensa Diaranzon ultimo na Renaissance Convention Center, comision organisatorio di e walkathon conhuntamente cu IDEFRE y e dos instancianan beneficiario cual ta Famia Planea y Cembrah, a lansa e promocion di e caminata aki cu ta un di e caminatanan mas anticipa na Aruba.
E tema di e caminata e aña aki ta pa uni comunidad y hunto haci un diferencia. Pesey tambe e caminata lo hiba e tema di ‘Walk to make a difference’. E diferencia di e aña aki ta pa Aruba uni hunto cu Aruba Way pa concientiza Aruba completo riba e tereno di educacion sexual y prevencion di Embarazo Hubenil. Pa e motibo aki a scohe e dos beneficiadonan di e caminata, Famia Planea y Cembrah.
Famia Planea
Famia Planea ta un fundacion sumamente activo cu ta concentra riba duna informacion riba e tereno di educacion sexual na nos hobennan y tambe mayornan y personanan cu ta duna guia na hobennan.
Por cierto e aña aki Famia Planea ta celebrando 40 aña di existencia y tin plannan grandi pa keda activo y brinda e bon servicio di semper na comunidad. Famia Planea na final di aña lo bay publica un buki literario den nos idioma Papiamento.
E buki aki tin como meta pa trece pa dilanti diferente situacionnan cu nos hobennan ta encontra nan mes y den forma di un storia ta duna guia na e hobennan con pa trata e situacion na un manera sano y responsabel.
E fondo recauda di e caminata lo bay pa Famia Planea pa asina haci posibel e publicacion di e buki literario.
Cembrah
Cembrah ta un Comision di Embarazo Hubenil Aruba cual ta consisti di diferente fundacion y organisacionnan cu ta trahando hunto riba e tereno di concientisacion, educacion y prevencion di embarazo hubenil.
Tambe Cembrah ta duna guia y sosten na mamanan hoben cu tin dificultad pa trata cu e situacion di ta un mayor. E fondo recauda di e caminta lo ta destina pa e trabou nan di Cembra riba e tereno di duna informacion y continua cu nan meta di concientiza nos hobennan y alaves mayornan riba prevencion di embarazo hubenil.
E aña aki IDEFRE un biaha mas lo duna su aporte na caminata di Aruba y tin bou su encargo e inscripcion y benta di T-shirt y tambe lo coordina e e ruta di e caminata. Algo di sumamente importancia ta cu e aña aki tin algun cambio den e ruta di e caminata.
E caminata lo sali for di e parking lot dilianti Gate 1 di Valero Aruba Refinery (dilanti AMC Unicon San Nicolas). Saliendo for di Gate 1, lo tuma e ruta di Lagoweg, Bernardstraat, Pastoor Hendrikstraat, Caya Dick Cooper, Bernardstraat, Lagoweg, St. Maartenstraat, B.E. v/d Zeppenfeldstraat, Caya Captain Robert Rodgers y finalmente termina na Gate 1.
Sra. Jeandor ta añadi cu ta conseha tur participante pa para nan auto un poco pafor di e lugar di e evenemento pa tene e lugar liber pa e caminata y evento cu ta sigui despues. Esaki lo haci’e mas facil tambe pa e trafico no pega.
Aruba Way Foundation ta invita tur fiel amante di caminata y Aruba henter pa pasa na IDEFRE pa asina inscribi pa e caminata. Cu solamente 5 florin cada participante ta haya un t-shirt. Pa mas informacion por yama Aruba Way Foundation na 589-4646 of IDEFRE na 582-4987.
Tambe e team di Aruba Way conhuntamente cu e fundacionnan lo bay ta presenta na diferente stacion di gasoline pa bende t-shirt. Dia y luga lo wordo anuncia despues. Aruba Way Foundation conhuntamente cu Famia Planea , Cembrah y IDEFRE ta finalisa cu un invitacion na henter pueblo di Aruba pa bin cana y duna bo aporte como bon ciudadano di nos dushi isla Aruba.
