Bishita productivo di Minister Dowers na Colegio Arubano
ORANJESTAD (AAN) — Minister di Enseñanza, mr. Arthur Dowers a bishita, diahuebs, Colegio Arubano. Den entrevista cu nos redaccion, el a informa cual ta e motibo di esaki.
E mandatario a señala cu for di momento cu gobierno a sinta nan a dicidi cu lo bishita tur school, y e aña escolar cu a pasa, na momento cu nan a cuminza cu e programa aki, y kier a bishita Colegio ya tabata cerca di vacacion, pero awor e dignatario a cumpli cu loke a ser priminti.
E mandatario kier a haya un impresion con tur cos ta funcionando na Colegio, pero tambe a bay cu intencion di conversa cu e leiding, y constata cual ta e condicionnan bao di cual e studiantenan ta haya les.
E dignatario a keda cu un impresion positivo te awor, aunke mescos cu den tur otro school tin retonan tambe na Colegio, y nan a papia tocante e evaluacionnan cu tabata tin na e school aki den pasado, unda cu e resultadonan tabata hopi negativo.
“E leiding a duna splicacion riba esaki, y nos a papia tambe tocante e plannan cu nos tin pa loke ta trata e reorganizacion di e sistema di educacion, y con mester bay pone tur hende traha hunto y wak den e mesun direccion, y e reaccionnan tabata sumamente positivo”, Minister Dowers a acentua.
E dignatario ta kere cu dentro di poco, na momento cu lo caba cu e analisis den Departamento di Enseñanza, cual ta den su ultimo fase aworaki, lo papia cu tur school bestuurs, incluyendo e leiding di Colegio.
“E ora ey nos ta bay yega na un cooperacion mas amplio, unda cu veld, a base di nan experiencia y loke nan ta mira den practica tur dia, lo por duna contribucion pa alivia cierto situacionnan, na bienestar di nos muchanan”, Minister Arthur Dowers a agrega.
E titular di enseñanza ta considera e bishita aki como uno sumamente positivo, unda nan a elabora tambe riba e ultimo desaroyonan tocante e Rector nobo pa Colegio.
“ Manera ta conoci tin un conflicto entre e school bestuur y e leiding, y mi tin confianza cu esaki ta bayendo awor den bon direccion y cu trankilidad. Mi a priminti tambe cu di parti di gobierno nos ta bay haci tur esfuerzo pa sostene e leiding y percura cu aki un par di tempo, e problemanan cu a wordo papia di dje den prensa lo ta tras di lomba.
“ Mi tin tur confianza, cu e conversacion cu nos tabata tin mainta, lo trece un luz hopi positivo den horizonte”, Minister Dowers a señala.
El a aclarea si cu no ta gobierno sino e bestuur di Colegio esun cu ta determina di cual forma nan kier maneha e school. Esey ta keda un responsabilidad primario di school, pero si, na momento cu school bestuur ta haci un peticion na gobierno pa nan sostene, nan lo honra esaki.
