Brazil TKD a selecta e atletanan pa e Best of the Best Maltin Polar Taekwondo Cup
ORANJESTAD (AAN)— Diahuebs ultimo e directiva di Brazil Taekwondo Stichting a reuni tocante e plan pa 2011 y tambe a selecta e atletanan pa e Best of the Best Maltin Polar Taekwondo Cup cu ta dia 2 di Oktober. Diahuebs awor 2 di September pa 4:30 di atardi na The Aruban Resort lo
anuncia e 40 atletanan cu lo ta participando den e mega campeonato aki cu ta tuma lugar dia 2 di Oktober den Centro Deportivo Betico Croes. E selectadonan a wordo selecta door cu nan a participa den un of mas di e 3 campeonatonan cu a wordo organisa door di Brazil Taekwondo Stichting cual nan tabata Gold Coast Taekwondo Cup, Ultimate Taekwondo Cup y Aruba Caribbean Cargo Taekwondo Cup. Di e 3 campeonatonan aki a selecta e atletanan di e siguiente scolnan di Taekwondo: San Nicolas Taekwondo Center, Estrella Taekwondo Center, Moi Dum Taekwondo Center, Tiger Taekwondo Center, Noord Taekwondo Center, Caribbean Taekwondo Instituut, Washington Taekwondo Center, Oranjestad Taekwondo Center y Brazil Taekwondo Stichting.
E directiva a pone hopi enfasis ariba e mihor atletanan cu tin na Aruba pa
asina por selecta 40 atleta pa asina por tin 40 pelea, cual 25 pelea lo ta
parti mainta y e otro 15 lo ta anochi. Aki pueblo lo por bin aprecia e
mihornan di e 9 scolnan di Taekwondo na Aruba bringa contra e paisnan
International. Tin 4 atleta cu a cualifica caba y diahuebs e lista lo wordo
presenta na pueblo, tur hende ta bon bini pa sa ken tur a cualifica.
E 15 peleanan di e anochi ta esnan cu ta bringando full contact, na unda cu
ta bay tin bon pelea y na unda cu pueblo por mira bon combate. Esnan cu a
perde e pelea di Danny Menendez, por bay aprecia esaki tambe. E focus grandi ta bay ta e Best Foto Shot.
