C.E.A. Lo keda sin director ora cu Sr. Ronny Paskel proximamente baha cu pensioen
ORANJESTAD (AAN):– Proximamente Cuerpo Especial Arubano lo keda sin director pa motibo cu sr. Ronny paskel lo baha cu pensioen. Segun Minister Arthur Dowers, ya caba ta buscando un persona pa reemplaza sr. Paskel. Mientras tanto Rombley ta funcionando como hefe suplente te ora cu gobierno nombra un otro director pa CEA. Segun Minister Dowers, e tin tur confianza cu CEA lo wordo maneha responsabel, den e cuadro aki tambe e mandatario lo sinta cu e hefe suplente pa dune e linea di maneho di gobierno y tambe pa discuti e overtimenan halto den e cuerpo aki.
Segun Minister Dowers e overtimenan aki lo mester wordo reduci durante e tempo cu ta nos dilanti y esaki ta un di e prome ordo di trabao cu Rombley a haya pa tene cuenta cune.
Ta asina cu tin varios solicitud di esnan pafor di CEA, sinembargo lo prefera wak den e cuerpo mes si ta haya un of otro candidato cu ta apto pa e puesto como director.
Si no logra esaki lo bay busca pafor di e organisacion e ora ey pa asina haya un candidato cu por bin na remarca como director di e cuerpo di CEA.
Tanto den Cuerpo policial y Cuerpo di Bombero a busca den propio cuerponan pa asina logra haya un persona capacita pa maneha e cuerponan aki, cada un riba su mes.
E berdad ta si cu ta mira cu den e cuerponan ya menciona hopi biaha no tin persona cu ta adecuado pa nombra como director. Pues esaki ta nifica un reto pa gobierno tambe pa inverti mas den e equipo humano pa asina percura cu momento tin posicionnan habri, cu tin den e cuerponan aki personanan capacita pa cu e nombracion di un director.
