Cambionan den articulo 27 inciso 3 y 4 ta inecesario
Segun parlamentario Booshi Wever
Raad van State a duna Aruba razon
ORANJESTAD (AAN)* Diamars a tuma lugar un reunion di parlamento den commission central na unda cu a trata e articulo 27 inciso 3 & 4 na unda cu hulanda lo kier haci cambio den statuut.
Lider di fraccion di MEP den parlamento sr. Booshi Wever durante e di dos conferencia di prensa di partido MEP a bisa cu e posicion cu partido AVP a tuma ta uno di entreguista. Sr. Booshi Wever ta sigui bisa cu durante cu a trata e cambio di statuut pa loke ta e cambionan di structura estatal cu ta encera cu tanto Curaçao y St. Maarten lo haya nan Status Aparte mientras cu Bonaire, St. Eustatius y Saba lo bira parti di Hulanda y lo forma e BES eilanden, a bin dilanti cu AVP a cambia di opinion.
Esaki pa motibo cu durante cu un delegacion di parlamento arubano tabata na Hulanda, e fraccion di MEP a entrega 7 amienda na unda cu 1 so a keda acepta y despues cu AVP na Hulanda a sostene esaki, awor ta laga MEP su so para cu su amienda.
MEP a declara na varios occasion di coopera 100% cu Antiyas Hulandes den e proceso di desintegracion cu e condicion pa no mishi cu autonomia di Aruba. Segun sr. Booshi Wever, cada pueblo tin derecho di autodeterminacion cu mester worde respeta y cu e autodeterminacion aki ta mara na un pueblo.
Esaki el a bisa den cuadro cu hulanda tabata kier a instala un commission pa investiga si Curaçao tin derecho pa haya su status aparte igual cu St. Maarten.
For di principio Hulanda kier impone cambionan cu ta innecesario den e proceso di desmantelacion di Antiyas Hulandes. Aruba a protesta e cambionan aki proponi den articulo 27 pa motibo cu esaki ta kita parti di autonomia di Aruba.
Dos parlamentario, srs. Andy lee y tambe Juan David irausquin a duna di conoce cu enberdad e cambionan aki ta encera cu Aruba lo perde un diki di su autonomia, segun Wever. Dia 13 di February 2009, Aruba a bay contra di cambio den articulo 27 di statuut y no ta acepta e cambionan aki cu despues a bay Raad van State na unda cu Aruba a haya razon cu e cambionan aki no ta necesario pa cu e proceso di desmantelacion di Antiyas Hulandes.
Den articulo 51 ta salvaguardia cu si no cumpli, tin pacto cu Aruba mester tene su mes na dje. E ora ey Reino lo por bay haci algo, pero esaki no ta necesario pa motibo cu partido MEP a declara di ta respalda y lo haci su maximo esfuerzo pa garantiza cu e proceso di desintegracion di Antiyas Hulandes sosode manera palabra.
