Caso cu Gianni’s Nutrition Center a entama contra ministerio publico lo haya sentencia aki dos siman
Segun Fiscal, productonan ta contene ingredientenan peligroso pa salud di hende
ORANJESTAD (AAN): E caso cu Alex Croes di Gianni’s Nutrition Center a entama contra Ministerio Publico despues cu un cargamento di su productonan a keda confisca lo conoce sentencia aki dos siman. Esaki ta loke huez a duna di conoce diaranzon ora cu e caso a tuma lugar.
Ta asina cu despues di a consulta cu Fiscal di Ministerio Publico, esaki fin di Juni, Inspeccion di Remedi a bay over na confisca un cargamento di e asina yama suplementonan cu ta contene e ingredientenan activo Yohimbe y/of Ephedra y cu ta wordo considera, segun leynan di Aruba como remedi.
E productonan aki ta prohibi pa wordo importa sin cu nan ta aproba y registra door di e Comision di Registracion di Remedi di Aruba. E posicion di Inspeccion di Remedi ta cu e suplementonan aki ta remedi y ta peligroso pa consumo humano door di nan efecto secundario, contando esaki tambe pa personanan cu ta importa nan pa propio uso.
Ex-Minister di Salud anterior, Booshi Wever a yega di papia tambe riba e caso aki y a señala cu como cu pa ley e sorto di productonan aki ta wordo marca como remedi, solamente nan por wordo prescribi pa medio di doctor.
Entre e consecuencianan secundario cu e remedinan aki por trece cune tin stroke, problema di curazon, riñon, y malezanan cardiovascular.
DIARIO a tuma contacto cu Vocero di Ministerio Publico, Ann Angela kende a duna di conoce cu pa loke ta e caso cu a tuma lugar diaranzon, Fiscal basa riba e raportahe di Instituto di Reino di Salubridad Publico y Medio Ambiente a keda constata cu e productonan aki ta dañino si nan wordo usa di e manera aki.
E productonan cu a ser confisca y cu ta contene e ingredientenan menciona ta entre otro pa baha peso, duna potencia of energia.
Huez a bisa diaranzon cu e lo duna sentencia aki dos siman. Na otro banda, Alex Croes ta para riba e hecho cu e kier su productonan bek. Mientrastanto, fiscal ta haya cu esey no lo ta e caso.
Despues cu Inspeccion di Remedi a consulta cu fiscal na Juni y cu a procede na confisca henter e cargamento, e investigacion di e caso ta bao responsabilidad di Ministerio Publico.
