Casonan penal den Corte awe
ORANJESTAD(AAN): Awe na corte ta bay tuma lugar diferente caso penal. E prome caso ta un caso den cual J.E.D. ta wordo acusa di intento di ladronicia den apartamento di un persona riba 9 di Juni 2010. E caso aki ta bin dilanti Pro forma. Despues ta bay tuma lugar otro caso pro forma.
Ta trata di un caso den cual L.A. ta wordo acusa di exportacion di cocaine riba 29 di April 2010.
Tambe e ta wordo acusa di posesion di marihuana den e periodo di 3 te 16 di Augustus 2009.
Alavez e ta wordo acusa di, conhuntamente cu un otro of otronan, a haci uso di un foto falsifica pa registracion di un boto den luna di Juni 2009.
Despues V.L.L mester presenta dilanti di huez, pa motibo cu el a wordo acusa di, conhuntamente cu un otro of otronan, ladronicia cu violencia di tas di un persona riba 12 di Januari 2010.
Tambe e ta wordo acusa di, conhuntamente cu un otro of otronan, ladronicia cu violencia di tas di un otro persona riba 12 di Januari 2010.
L. ta wordo acusa alavez di, conhuntamente cu un otro of otronan, ladronicia cu violencia di un kashi di placa di un oficina di number y/of un persona riba 4 di November 2009.
E ta wordo acusa tambe di, conhuntamente cu un otro of otronan, ladronicia cu violencia di placa y/of cigarianan di un minimarket y/of doño di e minimarket riba 9 di November 2009.
Despues ta bay tuma lugar un caso den cual G.G.M. ta wordo acusa di intento di ladronicia den un cas di pertenencianan di un persona riba 5 di April 2009.
Tambe e ta wordo acusa di ladronicia den un otro cas di pertenencianan di hende riba 5 di April 2009. Alavez e ta wordo acusa di a resisti cu violencia y/of menaza di violencia contra dos ambtenaar di polis riba e mes fecha ey.
E violencia tabata encera cu M. a intencionalmente ranca y/of trek den otro direccion cu e funcionarionan kier a hibe, a scop y lucha cu nan, a consecuencia di cual nan a sufri lesion. M. ta wordo acusa ademas di a menaza un persona, riba e mes dia, cu un crimen contra su bida, dor di intencionalmente bisa e persona ey cu e lo tope y lo reek su som y/of cu e lo no sosega te cu e caba cu ne.
Mas leu e ta wordo acusa di destruccion di un plachi di gips y/of un porta y/of plafond na warda di Polis di Nord riba 5 di April 2009 y di a resisti cu violencia y/of menaza di violencia contra otro ambtenaar di Polis, dor di dal e den su cara cu mokete y/of dor di bringa cu ne.
A consecuencia di esey e ambtenaar a sufri lesion.
Ultimo caso awe ta un caso den cual A.K.T. ta wordo acusa di a menaza un persona cu un crimen contra su bida y/of maltrato grave y/of maltrato cu arma riba 30 di December 2009, dor di manda e persona ey mensahenan di sms intencionalmente menazante y bise/grite cu si e haye un biaha mas den su cas, e lo dune un sota.
Tambe e ta wordo acusa di, conhuntamente cu un otro of otronan, a menaza un persona cu un crimen contra su bida y/of maltrato grave y/of maltrato cu arma riba 16 di Januari 2010, dor di mustre un arma di candela na un manera intencionalmente menazante y bise/grite (entre otro) cu si e haya su gana, e lo ta morto caba.
T. ta wordo acusa di, conhuntamente cu un otro of otronan, tabatin un of mas arma di candela y/of un of mas bala den su posesion den e periodo di 16 di Januari 2010 te 21 di Januari 2010, sin cu e tabatin permiso pa esakinan.
T. ta wordo acusa alavez di tabatin intencionalmente marihuana den su posesion riba 21 di Januari 2010. El a wordo acusa tambe di a intencionalmente cumpra y/of bende y/of transporta y/of sconde un laptop y/of charger den e periodo di 6 te 25 di Juni 2009.
