CEA ta duna KPA man den accion di cobra boet di Ministerio Publico
ORANJESTAD(AAN): Ministerio Publico lo sigui den augustus tambe cu su accion di cobra boetnan di trafico atrasa. E luna aki Polis lo haya yudanza di miembronan di Cuerpo Especial Arubano (CEA). Personanan cu tin boetnan habri y cu luna pasa ainda no a haya bishita di polis, por spera awor e uniformnan blauw scur di CEA tambe dilanti nan porta. Miembronan di CEA ta autoriza pa hiba hende cu keda sin paga KIA. Ministerio Publico ta sigui satisfecho tocante e forma cu e accion ta bayendo. Te na e momento aki, a cobra 84.000 Florin. Polis no mester a hiba ningun hende KIA.
Gran mayoria di hende cu worde bishita na cas, ta paga mes ora. Ademas a ripara cu e accion tin un efecto spin-off, caminda mucho mas publico cu otro ora ta meld na balie di Ministerio Publico pa paga transaccionnan.
En total Ministerio Publico a cobra di januari te juli di e aña aki casi 700.000 Florin na tur tipo di boet, cu ta 250.000 Florin mas cu den e mes periodo na 2009, tempo e suma total a yega rond di 450.000 Florin.
Caha di Ministerio Publico ta habri di Dialuna pa Diabierna di 8.00’or di mainta te 11.30’or di merdia y di 1.00’or di merdia te 3.30’or di atardi. Por paga cu cash y cheques. Manera conoci Ministerio Publico ta encarga cu ehecuta sentencianan di huez.
Den cuadro di e accion di ehecucion, personanan cu no a cumpli cu e boet cu nan a haya di huez, ta core chens pa worde hiba KIA pa sinta nan castigo. Pesey Ministerio Publico ta haci un suplica urgente na un y tur pa bin paga nan boet.
