Chofer di Arubus a perde su caso
Y ta keda retira di trabao
ORANJESTAD(AAN): Diaranzon huez a duna su veredicto den un caso cu chofer di Arubus di fam G. a entama contra e compania. E chofer a entama e caso dia 19 di Juli, pa motibo cu el a wordo retira di trabao, despues cu un sakito di cocaina a wordo haya den e bus cu e ta core, net ora e tabata baha warda. Ora cu e droga a wordo haya, gerencia di Arubus a dicidi di hasi un test di droga riba G. y el a test positivo pa uso di cocaina. El a admiti cu den weekend durante su oranan liber, un amigo a dune un tiki cocaina y el a uza esaki.
El a bisa si cu e droga haya riba e bus no tabata di dje. Segun G. nunca el a traha bao di influencia di droga.
E abogado di Arubus sinembargo a trece dilanti cu no ta prome biaha cu e chofer aki a haya su mes cu problemanan di disciplina etc. pa cu su trabao.
Abogado di G. durante tratamento di e caso a bisa huez cu na den diferente compania incluyendo WEB y ELMAR, si un persona test positivo pa uso di droga, e ta haya por lo menos un chens, pero den e caso aki G. no a haya un chens.
For di algun siman caba huez mester a duna su veredicto, pero cada biaha el a pospone esaki.
Diaranzon dia 11 di Augustus sinembargo el a keda cla cu su veredicto y el a dicidi di mantene e retiro di G., pues el a rechaza peticion di e chofer pa e wordo poni bek na trabao.
