Copa Don Elias Mansur a start sali cu tremendo partidonan
ORANJESTAD (AAN)— For di directiva di RCA nos a ricibi e resultado di e weganan cu a tuma lugar durante e torneo Copa Don Elias Mansur. Ariba Diabierna 20 di Augustus, RCA y San Luis Deportivo a inaugura e prome partido di e copa, RCA a gana San Luis cu score di 5-0, e golnan a wordo anota pa Franklin Werleman, Raul Aparicio, Steven Rua, Darren Nelson y Juan Santos; e referee di e wega aki tabata Sr. Rudy Angela. E siguiente partido tabata entre Unistars contra di Arsenal, wega cu a caba cu score di 3-1 pa Arsenal.
E golnan a wordo anota pa Igmar Lares na di 33 minuut di e di dos tempo, Benjamin Morillo a anota e prome gol na e di 36 minuut di e prome tempo y e mes a anota e di dos gol na e di 23 minuut di e di dos tempo. Pa Unistars a anota Jonathan Larmnonie.
Ariba Diasabra 21 di Augustus, Estrella a topa contra di Sporting y e team santacrusero a gana e encuentro cu score di 3-0, e golnan di Estrella a wordo anota pa M. Gutierrez na di 27 minuut, G. Barros na di 35 minuut y A.
Concecao na di 71 minuut; un carchi geel a wordo saca pa e hungador D. Raven. Den e siguiente encuentro, La Fama a enfrenta e team di Dakota y a gana cu score di 6-4. La Fama y Dakota a empata e wega aki na 1 gol pa banda y mester a disidi e wega pa penalty unda cu La Fama a resulta ganador.
E golnan di La Fama a wordo anota pa G. Cabrera (e prome gol na di 83 minuut) Penaltys: Germain Cabrera, S. Schwengle, Rigmar Lodowika, Felix Robles y Freddie Rodriguez. E prome gol di Dakota a wordo anota pa John Lugay na di 80 minuut, e penaltys: Joel Balentijn, Lionel Tromp, George Tromp y John Lugay.
