Destaho publico ta transparencia y ta logra haya miho proposicionnan atractivo for di mercado
Parlamentario Andy Lee
Mi ta para pa bon gobernacion,
ORANJESTAD (AAN):– Segun parlamentario Andy Lee, den e ultimo dianan por a lesa encuanto mudamento di e containerhaven di Aruba Ports Authority N.V. y e forma con lo selecta un operador nobo pa e containerhaven na Barcadera. E asunto aki a conduci na un peticion di ASTEC pa arbitrahe door di e Arbitrage Instituut van de Nederlandse Antillen en Aruba pa determina si concessieovereenkomst entre APA y ASTEC, fecha 15 december 2004, ta vigente tambe bou di e situacion nobo pa cu mudamento di containerhaven pa Barcadera, caminda APA lo ta selectando un operador di e containerhaven y no un stiwado manera ta e caso ta regla den e concessieovereenkomst actual.
Decisión di Arbitrahe: APA no ta mara na e duurovereenkomst cu ASTEC Decision di Arbitrahe, bou di punto 6.3 di e arbitraal vonnis, ta cu e mudamento di e terminal di container pa Barcadera y e trabounan di un operador pa e terminal nobo aki na Barcadera lo ensera un acuerdo nobo cu lo ta diferencia significantemente di e concessieovereenkomst actual.
Por lo tanto Arbitrahe a dicidi, bou di punto 6.4 di e arbitraal vonnis, cu e deliberacionnan entre APA y ASTEC, manera prescribi den e concessieovereenkomt actual, lo no ta aplicabel pa e meta nobo cu tin cu e terminal di container na Barcadera.
Por lo tanto, APA N.V. no por ser obliga pa hiba deliberacionnan dirigi ariba adaptación di e concessieovereenkomst actual pa acomoda ASTEC como operador, manera exigi door di Astec. Punto 6.8 di e arbitraal vonnis ta cla y raspa pa loke ta trata e posición di APA: e deseo di APA pa tene un destaho publico bou di condicionnan estricto cu ta garantisa marktwerking, transparencia y concurencia honesto, y door di cual por escoge e mihor oferta di e mercado, lo ta hustifica y den liña cu “Good Corporate Governance,” segun e decision di Arbitrahe.
Arbitrahe tambe a determina bou di puntonan 6.19 pa 6.22, cu bou di cierto condicionnan, den termino e concessieovereenkomst actual lo por ser termina, sin cu esaki lo mester conduci na daño y perhuicio, si APA actua den bon forma.
Por conclui pues cu Arbitrahe a determina claramente cu pa cu mudamento y seleccion di un operador pa terminal di container pa Barcadera, APA por termina e concessieovereenkomst actual cu ASTEC (bou di condicionnan stipula) y reemplea esaki cu un concessieovereenkomst nobo pa e operador di e terminal di container na Barcadera.
Destaho publico of no?
Den entre otro e edicion di 14 augustus 2010 di un vespertino na Hulandes por lesa cu APA lo hiba deliberacion cu ASTEC pa wak si ASTEC lo por bira operador na Barcadera, y si yega na un acuerdo, APA lo no tene mas un destaho publico pa selecta un operador.
Sorprendente ta e hecho cu a pesar cu APA no ta mara na e concessieovereenkomst actual pa cu e seleccion di operador pa e terminal na Barcadera, ta scoge pa deliberacionnan cu ASTEC prome cu dicidi si ainda ta bay over na destaho publico.
Pues, APA ta considerando activamente pa no tene un destaho publico pa cu seleccion di un operador pa Barcadera, dunando asina un posicion preferencial na e operador actual. Y aki nos ta yega na un punto cardinal den principio di bon gobernacion, den cual APA NV como entidad publico, tambe mester tene cuenta: excluyendo otro actornan for di un proceso convencional di destaho publico, ta scoge activamente pa limita proposicionnan atractivo y bentahoso cu por surgi for di e mercado y cu ta na beneficio di interes general di Aruba.
Un proceso transparente, habri y di competencia husto ta stimula tur participante pa duna un miho oferta posibel pa por bin na remarca pa cualifica pa e posicion, y ta evita cualkier pensamento di un posibel willekeur (trato preferencial) den e proceso.
Ta bon pa remarca cu ningun momento ta descarta e posibilidad cu e operador actual lo por duna e miho oferta, pero ta sumamente importante pa e proceso ta cana e caminda corecto.
Raad van Commissarissen di APA na juni 2009 a subraya e pensamento di un destaho publico habri y transparente cu nan aprobacion di diferente documentonan relata na Statutenwijziging di APA N.V.
(manera presenta na Gobierno dia 30 juni 2009), pero en particular cu e Tenderreglement APA N.V., caminda bou di artikel 4 lid 4 ta stipula cu “Concessies met geprognosticeerde concessie inkomsten voor APA NV van meer dan Afl. 500.000 zullen in het openbaar worden aanbesteed.”
Principionan di bon gobernación
Mi persona, Andy Lee, Fraccion di AVP y partido AVP semper a para pa principionan di bon gobernacion den aparato gubernamental como tambe den entidadnan den esfera publico. Den pasado sigur a opone tur proyecto cu sin mas no a bay pa destaho publico of cu no a cana un proceso habri, transparente y husto.
No tin motibo pa hala for di e principionan aki, y ta spera pues cu APA NV por bini cu motibonan valido pa hustifica y responsabilisa e posicion preferencial cu a tuma den e caso di seleccion di operador pa e terminal di Barcadera.
Ta tarea di Raad van Commissarissen pa sali na interes di APA NV, y pues pa hustifica y responsabilisa e posicion preferencial cu ta dunando e operador actual – na luga di un destaho publico convencional – y splica con esaki lo ta beneficia interes di APA NV como tambe beneficia interes general di nos Pais. Preguntanan por escrito na Minister referente e topico aki lo sigui den e dianan siguiente, pa trece mas claridad
