Analisis politico
ORANJESTAD (AAN): Nos no por enfatiza suficiente cuanto problema e diferente departamentonan ta causa e gobierno nobo di AVP. E mentalidad di MEP ta reina cerca hopi ambtenaar cu no ta satisfecho cu e cambio cu pueblo a pone den e gobernacion nobo.
Awe nos kier duna atencion na DOW. Si nos mira e top di DOW den e dianan aki ta parce cu semper nan tabata sostene e politiconan cu ta ministro awo. Ta parce cu tur hende a lubida con nan tabata celebra hunto cu Marisol Lopez Tromp e apertura di e brug di Marisol.
Un proyecto cu tabata uno cu ningun momento por a spera cu e hefenan di DOW tambe lo ta di fiesta. E manera cu a worde traha ariba e plannan di Caya Grandi tabata excepcional. Un dedidacion di banda di DOW cu masha poco nos a yega di mira den pasado. Ta dificil pa kere cu nan di DOW no a mira kico tabata pasando di berdad.
Naturalmente e hefenan di e departamentonan mester ta conciente cu ora nan a dicidi di escohe pa ta ambtenaar nan ta bay haya nan mes ta sirbi diferente gobierno. Lo tin di nan color politico y lo tin cu ta di otro partido.
Como ambtenaar nan tin e obligacion di haci nan trabao manera debe ser. Pero ora nan mira cu nan ministornan ta actuando contra tur sorto di regla no por worde spera di nan cu “befehl ist befehl”. Nan por opone ora e locura tabata gritando pa loke e ministtronan di MEP tabata haciendo.
Awo e gobierno nobo kier haci centro di Oranjestad un centero atractivo atrobe y ta bay inverti hopi placa energia y tempo den esaki pero ta di spera cu nan ta wak bon kico e hefenan di DOW ta bay haci. Un par di siman pasa a cuminza drecha e entrada di Caya Grandi. Esaki tabata un pida caminda cu ta menos cu 100 meter y a dura simannan cu esaki no por a keda cla.
Un daño financiero sumamente grandi pa e comerciantenan di Caya Grandi cu ya caba tabata sufriendo pa motibo di e proyecto di choller di e gobierno di MEP. Si DOW bay haci mescos cu e otro partinan di Caya Grandi e tiendanan por keda cera numa pasobra lo no tin cliente mas.
Un planeamento normal den casonan asina ta pa percura pa tur material cu mester pa haci e trabao tey y den un minimo di tempo ta haci e trabao cu un minimo di molester pa e comerciantenan.
E “super” rotonde di banda di waf a hera causa ceramento di negoshi pa motibo di e tempo largo cu esaki a tuma. Ta dificil pa e ministronan por wak tur cos cu mester worde haci door di e ambtenaarnan. Un di e otro partinan cu ambtenaarnan no ta preocupa nan cabez cu ne ta e exito di e desaroyonan economico.
Un ehempel di awe ta e proyecto na Wayaca. Tin un grupo di inversionista Arubiano ta invertiendo den un centro comercial na Wayaca cu lo sirbi Wayaca y Aerouerto. E proyecto aki ta para pasobra DOW a dicidi cu e proyecto aki no ta haya ni entrada ni salida. Ora studia e problematica aki un rato hende ta puntra nan mes con esaki por ta posibel.
Otro camindanan nan ta laga e trafico cana di un manera cu ta bisto cu accidentenan lo bay tuma luga eynan y ta tuma un of mas morto prome cu nan trata di haci algo na esaki. Otro caminda ta parce solamente pa stroba e desaroyo economico di nos isla nan ta conesha e ministronan pa tuma decisionnan incorecto.
Pesey un biaha mas for di aki un palabra di advetrtencia na nos gobernantenan nobo cu ta trahando duro pa pone nos pais den bon direccion atrobe. Ta e mesun ambtenaarnan tey. Tin cu ta di buena fe y berdad kier traha bon pero tin di nan cu ta busca tur manera pa nos gobernantenan haya critica pasobra cosnan no a bay manera mester ta.
Na Merca tur e ambtenaarnan den top ta worde reemplaza ora di cambio di gobierno pa sigura cu e gobierno nobo no worde stroba door di ambtenaarnan di e otro partido. Por ta cu a bira tempo pa na Aruba esaki tambe worde introduci.
