E sensacion Mulato tambe lo ta na Aruba pa e Cas di Glas event
ORANJESTAD (AAN): “Mulato” lo ta na caminda pa Aruba pa asina presenta na e tremendo evento contra di cancer “Cas di Glas” unda cu lo colecta mas di 450.000 Florin.
E evento aki lo tuma lugar dilanti di Cilo City Lounge y Cinemas. E artista aki a caba di worde nomina pa e “Orgullosamente Latino 2010″ Award.
Mulato lo presenta gratis pa asina logra haci e evento aki mas grandi y pa recauda mas hopi placa cu ta possible pa Koningin Wilhelmina Kankerfonds Aruba cu ta e fundacion di cancer na Aruba. E placa cu worde recauda lo bay pa un mobile breast cancer screening unit. E evento aki lo bay ta 4 dia for di 29 September te cu dia 3 di October.
Mulato yama Pablo Rafael Gonzalez Romero ta un musico cu ta tur caminda na Venezuela. Ora cu e no ta canta of toca un instrument e ta un abogado. El a nace na Caracas na 1969 y for di 13 aña el a cuminsa scucha Bob Marley cu su amigonan y esaki a keda te cu awor cu ne. E ta gusta tur loke ta positive y pesey el a dicidi di participa na e tremendo evento aki Cas di Glas. E idea aki di e evento ta uno cu ta worde uza na Hulanda pa recauda fondo pa un bon causa.
E personajenan lo ta den e cas pa 4 dia sin come pero lo ta den aire 24ora pa dia. Nan tin cu drumi y tur cos den e cas. Door cu e ta di glas tur hende por wak y lo tin diferente invitadonan cu lo bishita nan pa entrevista. Mulato lo duna un acoustic show den e cas mes y Diasabra e lo presenta riba e stage cu Diveana cu tabata cantante di los Melodicos y Juan Carlos Luces cu tambe lo bin Aruba. Mulato lo promove e evento aki tambe na Venezuela pa asina mas hende biaha cu nan pa Aruba.
