Estrella ta logra prome victoria den Copa Don Elias contra Sporting
ORANJESTAD(AAN)—Diasabra anochi, e naranjadanan di Santa Cruz, Estrella a mira accion pa prome biaha den Copa Don Elias Mansur entrentando e muchanan di Sporting. Ainda por corda aña pasa e muchanan di Estrella tabata tin un desastroso prome buelta, pero a sa di trece algun refuerzo y asina ekipo a logra yega te na sub campeon di Aruba. E aña aki, Estrella a trece algun refuerzo pa asina trata di trece e titulo di campeon back den Papilon cual for di 2006 no a sosode.Den prome mitar, por a tuma nota cu varios hungador nobo di Estrella a cuminsa e wega y tabata busca e manera pa bay den contra atake.
Tabata casi na final di prome tempo, unda cu Miguel Guitierez cu ta anota pa asina pone Estrella ariba cu score di 1-0.Asina tambe e prome mitar a bay aden cu score di 1-0 na fabor di Estrella.
Den di dos mitar, ekipo di Estrella a subi tereno mucho mas decidido cu den prome mitar y sigur tabata haci algun bon combinacion riba tereno.
Estrella a bay bon den contra atake y pa medio di Gleison Do Santos ta anota su prome gol y e di dos gol pa asina manda Estrella ariba cu score di 2-0.Despues di e gol aki, Estrella a sigui domina y aki tabata Alexandré Conceiçao ta anota e di tres gol pa aisna haci e wega 3-0.
Despues di e gol aki, ekipo di Sporting a haci algun bon contra ataki y sigur a crea algun oportunidad di gol unda cu por a tuma nota cu keeper Gregory “The Pink Panter” Bislip kende a drenta den di dos mitar a haci algun tremendo salbacion pa mantene e gol di Estrella limpi.
Asina tambe e wega a termina cu score di 3-0 na fabor di Estrella.Diamars awor ekipo di Estrella lo mira accion un biaha mas pa 7:00 di anochi na Stadion di RCA, ta pidi tur fanatico di Papilon y Santa Cruz pa bin na masa pa apoya ekipo di Naranjada nan di Santa Cruz Estrella.
Den otro informe, por a compronde cu Seth Croes, hungador di Estrella Junioren lo tin un tryout cu ekipo di Zwolle na Hulanda, Estrella Junior R&P Freight Services ta desea Seth Croes tur clase di exito awe den e tryout na Hulanda.
Palabranan di exito ta bin di parti di Lando, Jun Jun Croes y tambe di Ronald “Pandushi” Solognier y full ekipo di Estrella junioren caminda cu Seth Croes a participa como hungador y pa dos aña sigui a titula campeon di Aruba.
