Estrella Taekwondo Center a sali Best Team den e 1st Aruba Caribbean Cargo Taekwondo Championship
ORANJESTAD (AAN)— Recientemente Brazil Taekwondo Stichting a organisa e prome Aruba Caribbean Cargo Taekwondo Championship e ultimo campeonato pa e cualificacion di e Best of the Best Maltin Polar Taekwondo Cup cu ta tuma lugar dia 2 di Oktober na Centro Deportivo Betico Croes. Den e campeonato tabata tin hopi sorpresa entre e bringadornan. Tur hende a bringa den nan categoria, edad y peso y juist esaki a trece sorpresa pasobra mundo ta bayendo den e direccion di sistema electronico y peso.
Nos di Aruba no por keda atras den esaki si nos kier ta na top, nos mester adapta nos sistema y sigui participa den eventonan Internacional, por ehempel e muchanan mester cuminsa di chikito siña con pa scop pa cabez pa ora nan bira grandi esaki ta un custumber.
E peleanan a bay for di chikito te cu grandi mescla pa asina e publico por a mira diferente categorianan di pelea tras di otro. Sr. Eric Barry kende tabata presente cu su scol San Nicolas Taekwondo Center a bin pa coach su team di 7 atleta y a haya su mes ta para referee durante henter e campeonato.
E prome pelea a bay entre Adkeem Lowe y Jezuel Dubero, un pelea cu tabata tin hopi combate di ambos bringadornan. Adkeem kende ta un nobato den Taekwondo tabata sa bon con pa defende su mes, bringando den un categoria mas halto.
E contra atake di Adkeem a yude bon na unda cu cada biaha cu Jezuel a ataca ya e tabata cla cu un contra atake, esaki tabata bon pa un score final di 8-2 pa Adkeem Lowe.
E pelea cu tabata tin basta confusion tabata e pelea entre Marwin Lont y Ettienne Geerman. E coach di Ettienne tabata preocupa pa e grandura di Ettiene kende mester a bringa contra di Marwin, pasobra Marwin ta 2 cabez mas chikito cu Ettienne.
Aki ta peso, edad y categoria ta conta, bo ta bringa pa peso, sea e contrincante ta mas grandi of mas chikito cu bo. Esaki tabata un discusion na unda cu un mayor a drenta y bisa cu e coach ta dicidi, ora a puntra Marwin si e ta bringa e la bisa cu si e grandura di Ettienne no a spante.
E prome rond entre Marwin y Ettienne a termina 4-4 (empate), den e di dos rond Ettienne a cuminsa ataca mas na unda cu Marwin tabata contra atake cu back kicks, pero esaki no tabata score cada biaha.
Ettienne tabata sa bon e ora ey con pa ataca Marwin na unda cu esaki tambe a yuda cu Ettienne por a score 3 punto y Marwin 1 punto contra, e pelea a termina 7-5 pa Ettienne Geerman.
E otro sopresa tabata e pelea entre Claudia Arends y Erica Barry, hopi a kere cu Claudia lo gana e pelea. Erica a caba di subi di categoria pa junior na unda cu awor si e mag di scop pa cabez a bin ta soprende tur hende.
Den e prome rond di e pelea ambos atleta tabata atacando otro buscando punto, esaki tabata manera tiketje, e rond a termina 3-3. Den e di 2 rond Erica a bin bek mas agresivo y a pone Claudia bao presion na unda cu Claudia realisa cu e mester a haci algo bek. Tabata tin scop pa cabez na unda cu 3 punto tabata cay pa tur dos atleta e rond a termina 13-13.
E ora ey mester a bay den sudden dead na unda cu e prome cu score ta gana e pelea, aki Erica a logra di score prome cu Claudia y a sali Victorioso, despues Erica Barry a topa Alyeska Lake na unda cu Erica a gana e pelea aki tambe cu un score di 8-4.
E otro sorpresa tabata e pelea entre Jennifer Werleman y Isabel Gonzalez. Jennifer a perde varios biaha caba contra di Isabel y esaki por tabata e caso diasabra tambe. Den e prome rond Isabel a lastra Jennifer cu “tolio” na unda cu cada biaha cu Isabel a ataca, Jennifer tabata laat cu su contra atakenan. E prome rond a termina 10-2 pa Isabel Gonzalez.
Den e di dos rond nos no sa kico a pasa cu Jennifer, pero e la bin bek for di morto of kico e la bebe e la bin bek manera un swafel cayente pa gana e pelea. E rond aki a termina 13-13, na unda cu mester a bay den sudden dead y na unda cu Jennifer Werleman a logra di score prome y a sali Victorioso. Jennifer kende a yega final, mester a bringa contra di Jada Mejia.
E dama Jada a pone drama den tur dos rond, sin miedo y cu hopi curashi e tabata sa con pa bringa contra di Jennifer. Den e prome rond Jada a cuminsa ataca Jennifer na unda cu Jennifer a manera haya un shock y no por a haci nada, e coach a trata di saca algo for di Jennifer na unda cu e la logra di score 3 punto, pero Jada tabata tin mas energia.
E prome rond a termina 10-3 pa Jada Mejia. Den e di dos rond Jada a bin manera un flecha stret den atake cu tur sorto di scop. Jennifer a conose tur e atakenan e ora ey, Jada tabata manera abeha ariba Jennifer y a score punto tras di otro, e rond a termina 21-5 pa Jada Mejia.
E referee no tabata tin ni un otro caminda di wak y haci su notacion di e pelea aki. E otro desapunto tabata e pelea entre Jerrick Vlaun y Meldrick Boekhoudt. Jerrick kende tabata ganando e pelea cu un score di 15-11 a bin ta perde esaki pa aviso di e referee.
Bo por ta ganando un pelea, pero si bo haya 8 aviso for di e referee, automaticamente bo ta perde e pelea y esaki tabata e situacion di Jerrick kende tabata tin e pelea gana, pero na otro banda Meldrick a keda pusha pa gana su pelea te na e ultimo 30 secondenan prome cu e referee a duna Jerrick su ultimo aviso pa sali for di e arena di combate.
Un desapunto grandi pa Jerrick Vlaun. E otro hoben cu a laga nos cu boca habri cu su contra atake tabata Vladimir Kock. Vladimir a pone Daniel Salazar yanga cabez so. Vladimir a haci un cos cu su back kicks, a parce cu e back kicks nan aki ta hayando mas y mas fama na Aruba entre e atletanan.
E pelea a termina 7-5 pa Vladimir Kock. Awor cu e campeonato a termina e directiva di Brazil Taekwondo Stichting ta bay reuni diahuebs pa asina saca e atletanan cu a participa den e tres campeonatonan organisa pa Brazil Taekwondo Stichting pa e Best of the Best Maltin Polar Taekwondo Cup.
Esaki ta bay wordo divulga dia 2 di September na The Aruban Resort pa 4:30 di atardi. Tambe nos kier e recorda prensa cu tin varios premio pa prensa cu ta relaciona cu e Best of the Best Maltin Polar Taekwondo Cup cu ta dia 2 di Oktober na Centro Deportivo Betico Croes.
E mihor bringador femenina a bay pa Jada Mejia di Caribbean Taekwondo Instituut y e mihor bringador masculino a bay pa Vladimir Kock di San Nicolas Taekwondo Center. E mihor referee a bay pa Sr. Eric Barry di San Nicolas Taekwondo Center.
E mihor team a bay pa Estrella Taekwondo Center, cu un total di 45 punto, ganando 6 prome lugar di e 7 atletanan cu a bringa pa e team cup. E atletanan cu a logra esaki ta: Thais Rodriguez, Meldrick Boekhoudt, Lucy-Ann Wouters, Dicmar Thiel, Dylan Croes y Ettienne Geerman.
Un pabien di parti di Brazil Taekwondo Stichting, esaki ta e di 6 biaha cu Estrella ta saliendo Best Team pa e aña aki ta parce cu no tin un team pa gana Estrella Taekwondo Center. E directiva di Brazil Taekwondo Stichting kier a gradici Aruba Caribbean Cargo Inc, mediconan di ESM, e referee Sr. Eric Barry, e mayornan y e publico cu a yuda pa e evento por tabata un exito.
