Fiesta den marduga a caba den problema cu bisiña
ORANJESTAD (AAN): Diabierna pa cinco’or y mey di marduga na un cas den Weg Roi Congo, un homber cu ta biba den e apartament a yama central di polis pa molester di musica duro. Segun vocero policial patruya di San Nicolas a dirigi su mes na e sitio y aki a papia cu e homber di inicial L.B. di 47 aña naci na Aruba. El a bisa polis cu su bisiña tabata tin un fiesta na su cas pero e musica tabata hopi duro. El a bay papia cune pa pidie pa hala nan auto di su porta.
Esaki a bira un problema dor cu un di invitadonan, un homber di inicial S, a coi un piedra y kibra e glas di apartament.
Ora cu S. a hasi esaki el a corta su man. Na e yegada di polis ya e persona aki no tabata tey mas.
Polis a papia cu K.P, di 20 aña naci na Aruba, cu ta e bisiña cu a tene e fiesta y e la pidi disculpa y a bisa cu e ta bay papia cu S. pa paga e gastonan.
